Пандемия кезіндегі отандық бұқаралық ақпарат құралдарының қызметін талқылауға арналған алаң жұмысына отандық және шетелдік топ-менеджерлер, жетекші медиа агенттіктердің сарапшылары, ірі халықаралық ұйымдар мен шетелдік жоғары оқу орындарының ғалымдары, мемлекеттік сектор мен продакшн-компаниялардың өкілдері қатысты.
«Пандемия Корпорацияның телесериалдар түсіріліміне кедергі болғанымен, өндіріс толықтай тоқтап қалған жоқ. Елімізге індет әлі жете қоймаған тұста ұлы Абайдың 175 жылдығына арналған «Абай» сериалының, Әл-Фарабидің 1150 жылдығы қарсаңында жоспарланған «Әл-Фараби» телехикаясының түсірілім жұмыстары басталып кеткен болатын. Еліміздің әр аймағында жүргізілген түсірілім жұмыстары төтенше жағдайға байланысты сәл кешеуілдегенімен аяқтап үлгердік. Қос тарихи туынды экранға Тәуелсіздік мерекесінде шығады», деп атап өтті Басқарма төрайымы.
Сонымен қатар Ұлттық арна егемендіктің 30 жылдығына арналған 100 бөлімнен тұратын «Замандастар», Халық жазушысы Ә.Нұршайықовтың романы желісі бойынша түсірілген «Махаббат, қызық мол жылдар» телехикаяларын ұсынбақ. Ләззат Танысбай осы ретте «Қазақстан» телерадиокорпорациясы түсірген отандық фильмдерге шетелдік нарықтан қызығушылық жоғары екенін жеткізді.
Биыл «Qazaqstan» және «Balapan» телеарнасының сериалдары АҚШ, Латын Америкасы елдерінде ағылшын, испан және португал тілдерінде көрсетілмек. Келісімшарт АҚШ-тың желілік және спутниктік хабар тарату қызметін жүзеге асыратын «Olympusat» компаниясымен жасалған. Сатылған өнімдер тізімінде «Ғазиз жүрек», «Оралу», «Қашқын», «Жаңғырық», «47 баланың анасы», «Шырағым» телехикаялары мен «Balapan» телеарнасының «Тынымсыз шөжелер», «Сәби», «Еркелер», «Шахмат патшалығы», «Пырақтар» анимациялық жобалары бар.
Одан бөлек, жалпы саны 242 бөлімнен тұратын сериал мен анимациялық жоба ТМД-дағы ең үздік онлайн-кинотеатр саналатын IVI.RU платформасы арқылы таралмақ. «Qazaqstan» арнасы телекөрерменге биыл жалпы саны 300-ге жуық сериядан тұратын 13 отандық телехикая ұсынуды жоспарлап отыр.
