Кешті ақын, кітапхана қызметкері Талғат Тілеулесов жүргізді. Шараға Мәдениет қайраткері Еркін Құрманбек, ақын Нұрлыбек Қалауов, Ақтөбе облысының мәдениет, архивтер және құжаттама басқармасының басшысы Алтынай Юнисова және кітапхана қызметкерлері, поэзияны сүйетін, әсемдікке жаны құмар жастар қатысты.
Ақын Ақұштап Бақтыгереева өмір мектебінде кездесетін өзекті мәселелерді қозғап, өлеңсүйер қауымды бір серпілтіп тастады. Әсіресе бүгінгі аналардың ұлт болашағы болып саналатын қыз тәрбиесіне ерекше ден қойып қарауын айта отырып, алаңдаушылық білдірді. Ақынның айтуы бойынша қыз баласы өзіне тән нәзіктікті, биязылықты, тазалықты ешқашан лайламауы керек. Сонау заманнан келе жатқан тектілік пен қайсарлықты бойына жинаған қазақ қыздарының ізін жалғайтын, ұлтымыздың қанын сақтап қалатын нағыз «қазақ қызы» деген атқа лайық болу керектігін жеткізді. Ақұштап Бақтыгереева өзінің аяулы анасына деген сағынышын өлең жолдарымен жеткізе отырып, асыл аналарды қастерлей білуге, жүректеріне сызат түсірмеуге шақырды. Ақын адам өміріне азық боларлық дүниелерді айта отырып, өз шығармашылығынан сырға толы өлеңдерін оқыды.
Жас ақын Олжас Қасымов Ақтөбе жеріне алғаш рет келгенінде дәл осындай әдемі, әсерлі кеште жолыққанына ризашылығын білдіре отырып, көрермендерге өлең жолдарын тарту етті. Әдеби кешке жиналған өлеңді сағынған көрермендер үшін бұл рухани демалыс болды. Киелі ордамызда осындай шаралардың саны арта түссін демекпіз!
Марал ЖАЛҒАСҚЫЗЫ,
С.Бәйішев атындағы Ақтөбе облыстық әмбебап ғылыми кітапханасының қызметкері
