Қала тұрғындарының жобалық ұсыныстарға дауыс беру қалай жұзеге асқанын Алматы қаласының Стратегия және бюджет басқармасы басшысының орынбасары Жанар Жазылтаева баяндады.
«Биыл барлығы қала тұрғындарынан құны 23,7 млрд теңге болатын 796 жоба түскен. Бұл – 2019 жылғы өтінімдер санынан 2 есе көп. Нәтижесінде, 10,7 млрд теңге сомаға қала тұрғындарының 448 бастамасы дауыс беруге жіберілді. Жобалардың біреуін авторлардың біреуі қайтарып алды, сайтта барлығы 795 жоба бар. Өткен жылы барлығы 333 жобалық ұсыныс түскен. Біз екі есеге дейін айтарлықтай өскенін көріп отырмыз», деді Ж.Жазылтаева.
Өтініштердің басым бөлігі абаттандыруға бағытталған: құрылыс және тротуарларды, пандустарды, арықтарды жөндеу, жалпыға ортақ орындарда балалар және ойын, спорт алаңдарын орнатып, жөндеп, жарықтандыру. Сонымен қатар жаяу жүргіншілер аймағын жөндеу, күркелерді жөндеу және орындықтар мен қоқыс салғыштарды орнатуға қатысты ұсыныстар енгізілді.
Рұқсат етілмеген 281 жобаға қатысты айтар болсақ, бұл ұсыныстардың кері қайтарылуының негізгі себептері – жобалық ұсыныстардың санаттарына сәйкес келмеуі, жалпы қолданыстағы нысан болмауы. Сол сияқты жобалық ұсыныстарды жүзеге асыру аудан әкімі аппараттарының құзыреттілігінен тыс болған жағдайда орындалмайды. Бұған қоса учаске жеке меншік, тұрғын үй кешенінің, бау-бақша серіктестігі аумағында орналасса және жеке коммерциялық сипатта болса қолдау таба қоймайды.
Аяқталмаған 60 жобалық ұсынысқа қатысты айтар болсақ, олар авторлары нақтылап, қайтадан өз ұсыныстарын енгізуі үшін түзетуге жіберілді. Соған қарамастан, тұрғындардан жобалық құжаттамасын жасап, болмаса қандай да бір есеп жүргізу талап етілмейді.
«Сарапшы комиссия негізіндегі тиісті мамандар көмек көрсетеді.Тұрғындарды ұнаған жобаларға дауыс беруге шақырамын. Жақсы жобалардың көп екенін атап өткім келеді. Биыл келіп түскен ұсыныстар саны көп болды, аудандар бойынша белсенділік айтарлықтай жоғары», дейді Жазира Жазылтаева.
Тұрғындар екі тәсілмен – онлайн және қағаз арқылы дауыс бере алады. Одан әрі қорытындысын шығару үшін дауыс беру нәтижелерінің негізінде сарапшылар кеңесі биылғы 25 қарашадан кешіктірмей шешім қабылдайды. Дауыс беру нәтижелері мен сарапшы кеңестің шешімі әкімдіктің интернет-ресурсында, БАҚ-да жарияланбақ. Одан кейін жобаларды «Бюджетке қатысу» жобасының әкімшілері – аудандық әкімдіктер жүзеге асырады.
АЛМАТЫ
