Ұлттық жаңғыру бойынша жол картасы әзірленуде

Ақпарат және қоғамдық даму вице-министрі Болат Тлепов об­лыстық «Рухани жаңғыру» жоба­лық кеңсесі қызметкерлерімен кездесуде осылай деді. Түркістан облысына жұмыс сапары барысында Болат Тлепов облыс әкімінің орынбасары Сәкен Қалқамановпен бірге Түркістандағы «Конгресс-Холл», «Алатау медиа» және «Сапар» ор­талықтарын аралап көріп, жұ­мыс­тарымен таныс­ты. Мұнан соң вице-министр Қожа Ахмет Яссауи атындағы Қазақ-Түрік уни­верси­тетінің кітапханасында болды, сонда орналасқан облыстық «Рухани жаңғыру» жобалық кеңсе­сінің жұ­мысымен де танысып шықты.

Өңірде биыл «Туған жер» арнайы жобасы аясында меценаттар тарапынан 2 млрд теңгеден аса қаржыға 75 нысан халық игілігіне берілген. Сонымен қатар «Түркілер төрі Түркістан» ат­ты халықаралық онлайн-конферен­ция, «Рухани жаңғыру: Түркістан дәрістері» атты облыстық деңгейде кез­десулер ұйымдастырылған. Жал­пы, жыл басынан бері «Рухани жаң­ғыру» бағдарламасы аясында облыста 821 іс-шара өтіп, 100 мыңға жуық адам қамтылған. Іс-шаралардың басым бөлігі онлайн форматында, челлендж, байқау, кездесулер түрінде ұйымдастырылуда. Жыл бойғы ат­қа­рылған жұмыстар туралы вице-министрге облыстық «Рухани жаң­ғыру» жобалық кеңсесінің басшысы Айдар Сейдәзім жан-жақты баян­дап берді. Елбасы Нұрсұлтан Назарбаевтың «Болашаққа бағдар: рухани жаңғыру» атты мақаласындағы негізгі бағыттардың бірі – «Жаңа гуманитарлық білім. Қазақ тіліндегі 100 жаңа оқулық» арнайы жобасы. Аталған бағыт аясында облыста биыл 46 іс-шара ұйымдастырылып, оған 6 мыңға жуық адам қатысқан. Өңірдегі барлық білім беру мекемелерінде жоба туралы жан-жақты түсіндіріліп, сынып, тәрбие және түрлі ашық сабақтар өткізілуде. Барлық кітапханалар ар­найы шығарылған кітаптармен қам­тылуда. Болат Анапияұлы атқа­рылған жұмыстарға оң бағасын беріп, кеңсе қызметкерлерімен өзара пікір алмас­ты. Бағдарламаның басым бағыттары бойынша жұмысты одан әрі жандандыру жөнінде жаңа бастамаларды таныстырды. Сондай-ақ вице-министр бірқатар үкіметтік емес ұйым басшыларымен кездесіп, алда атқарылатын жоба-жоспарлар жөнінде пікір алмас­ты. Кездесу барысында үкіметтік емес ұйымдардың жұмысын жандандыру, жобаларды қаржыландыру, жүйелеу бағытында қолға алынғалы отырған бастамалар жөнінде баяндалды.

Оңтүстік өңірге сапарында вице-министр алдымен Шымкент қа­ласында «Рухани жаңғыру» өңірлік жобалық кеңсесінің қызметкерлерімен кездесу өткізген болатын. Кездесу барысында вице-министр бағдарламаны Ұлттық жаңғыру кезеңіне көшіру бойынша жол картасын әзірлеудегі жоспарларды айтып өтті. Жол кар­тасы аясында мемлекеттік тіл мәрте­бесін арттыру, жоғары ұлттық және жал­пыадамзаттық құндылықтар не­гізінде рухани-адамгершілік және патриоттық тәрбие беру, еңбек адамын қалыптастыру, ауылды жандандыру сынды кешенді іс-шаралар қамтылатын болады. Сондай-ақ үшін­ші мегаполисте «Сақ» киностудия­сы қызметімен танысқан Болат Тлепов сапалы анимациялық фильмдер шығару бойынша атқарып жат­қан жұмыстар және өскелең ұрпақтың дамуына қосқан баға жетпес үлесі үшін алғысын білдірді. Айта кетелік, «Сақ» киностудиясы биыл «Рухани жаңғыру» бағдарламасы аясында Шымкент қаласы әкімдігінің қол­дауымен, «Qazaqstan» ұлттық теле­арнасының тапсырысы бойын­ша, Ұлы даланың ұлы тұлғасы, ғұлама Әбу Насыр Әл-Фарабидің 1150 жыл­дығына арналған «Әл-Фараби» көпсериялы тарихи фильмін түсіруді аяқтады.

Сонымен қатар вице-министр Шым­кент қаласының даму тарихын бейнелейтін «Цитадель» аума­ғын аралады. Ескі қаланы жаң­ғыр­ту бойынша қазба, реставрация­лау жұмыстарының бірінші кезеңі аяқ­талған, енді келесі жылы «Цитадель» аумағында ашық аспан ас­тындағы музей және амфи­театрдың ашылуы жоспарланып отыр. «Ци­тадель» бо­лашақта Шымкенттің негізгі туристік орталығына айнал­мақ.

Шымкент – Түркістан