Оқиға • 16 Қараша, 2020

Ауыл әйелдерінің әлеуметтік белсенділігі артуда

15 рет көрсетілді

«Ауыл әйелдерінің ауылдағы өмір сапасын арттырудағы бас­тамалары және Тұрақты Даму Мақсаттары-2030 жетістігі» атты Қазақстанның Ауыл әйелдерінің ІІІ Республикалық форумы өтті. Қазақстан Президенті жанындағы Әйелдер істері және отбасылық-демографиялық саясат жөніндегі ұлттық комиссияның төрайымы Ләззат Рамазанова Президент Әкімшілігі Басшысының бірінші орынбасары Дәурен Абаевтың форум қатысушыларына құттықтау сөзін жеткізді.

Құттықтауда айтылғандай, бүгінде ел халқының 40 пайыздан астамы ауылдық жерлерде тұрады, сондықтан ауыл­ды дамыту мемлекеттік сая­сат­тың басым бағыты болып отыр. Бұл ретте әйелдердің әлеуе­тін күшей­­туге ерекше мән бері­леді, жыл сайын олардың эко­номи­калық белсенділігі мен әлеумет­тік жауап­кершілігі артып ке­леді. Бұған бүгінде әйелдер өз кәсіп­орындарын ашып, шаруа қо­жалықтарын басқарып, бірегей өндірістерді іске қосып, мыңда­ған адамды жұмыспен қамтып отырғаны дәлел.

Өз сөзінде Ләззат Рамазанова агро­өнер­кәсіптік кешенді дамы­ту­дағы ауыл әйел­дерінің маңызды рөлін атап өтті. «Қазақ­стан Пре­зиденті Қасым-Жомарт Тоқаев өз Жолдауында ауыл шаруа­шы­лығын өркендетпей бәсекеге қабілетті экономика құру мүмкін емес екенін айтып, ауыл мен агроөнеркәсіптік кешенді одан әрі дамыту бойынша маңызды мін­дет­терді айқындады. Бұл міндеттерді іске асыруда, әрине ауыл әйелдеріне үлкен және жауапты рөл бөлінген. Ауыл­дағы әйелдердің кәсіпкерлік бас­тама­ларын қолдау түрлі мем­лекеттік бағдар­ламалар арқылы жүзе­ге асырылады. Бүгін­де ауыл­дағы шағын, орта бизнес субъек­­тілерінің жалпы санының 42,2% әйелдер басқарады», деді Л.Рамазанова.

Ұлттық комиссия төрағасы отбасылық дәстүрлерді сақ­тау­дағы ауыл әйелдері рөлінің маңы­зына тоқталып, бүгінде ауылда 2 млн-ға жуық отбасы (44,5%) тұратындығын атап өтті.

«Ежелден отбасы қоғамдағы бірлік­тің, бейбітшілік пен келі­сімнің символы болған Қазақ­стан үшін бұл өте маңызды. Сон­дық­тан еліміздің барлық өңірлер­інде отбасы институтын нығайту және дамыту мақсатында жүйелі жұ­мыс жүргізілуде. Ауыл әйел­дерін ілгерілетудің негізгі мәсе­ле­лері 2030 жыл­ға дейінгі отба­сылық және гендерлік саясат тұ­жы­­рымдамасында көрініс тап­қан», деді Л.Рамазанова.

Ол сондай-ақ пандемия кезін­де қабылданған мемлекеттік қол­дау шаралары ауылдағы кәсіпкер әйелдер үшін де маңызды екенін атап өтті. Бұл қарыздар, кредит­тер және салықтар бойынша өсім­­пұлдарды, айыппұлдарды жою, мемлекеттік сатып алуларды жүр­гізу тәртібін оңайлату, бюд­жетке төленетін салықтық және өзге де төлемдерді кейін­ге қал­дыру, салықты есептеу мен тө­леуді 6 айға күшін жою және басқа да бірқатар шара­лар. Алай­да объективті отбасы­лық мән-жайлары мен міндет­те­мелері бар әйелдердің пайдасына шешуді қажет ететін де мәселелер бар.

Жыл сайынғы ауыл әйел­дері­нің форумы Парламент, мәсли­хат депутаттары, орталық және жер­гілікті атқарушы органдардың өкілдері, аудандар мен ауылдық округтердің әкімдері, ауыл шаруашылығы кәсіпорын­дары­ның басшылары мен мамандары, ауыл интеллигенциясының өкілдері, қоғамдық ұйымдардың бел­сенділері қатысатын ауыл әйелдерінің әлеуметтік белсен­ділі­гін арттыруға бағытталған сын­дарлы диалог алаңына айнал­ды.

Л.Рамазанова форумда ауыл мен агроөнеркәсіптік кешенді дамы­тудағы әйелдердің рөлін одан әрі жандандыру бойынша бірқатар нақты міндеттерді алға тартты. Сондай-ақ форумда жылдың үздік белсенділері – аза­маттық қоғам, бизнес және агро­өнеркәсіптік кешен, БАҚ өкілдері, сондай-ақ ауылдық жерлерді дамытуға үлес қосып жүрген үздік ауыл ең­бек­керлері анықталды. Сонымен қатар «Асқар шыңдарға ту тіккен ауыл әйел­дері/100 историй успеха сельских женщин» атты кітабының тұсаукесері өтті.

Форумның ұйымдас­тыру­шылары мен ресми серіктестері ретінде Қазақстан Республикасы Президентінің жанындағы Әйелдер істері және отбасылық-демо­графиялық сая­сат жөніндегі ұлттық комис­сия­ның және Coca-Cola халық­ара­лық қорының, ЕҚЫҰ-ның Нұр-Сұл­тан­дағы Бағдарламалар офи­сінің қол­дауымен «Жасыл эконо­мика және G-Global-ды да­мыту Коалициясы ЗТБ, «EXPO&WOMEN» ҚМ, «Қазақ­стан әйел­дерінің аграрлық одағы» ЗТБ, «Әлеуметтік динамика» қоры бір­лесе жұмыс атқарып келеді.

Соңғы жаңалықтар

Ұқсас жаңалықтар