Күн санап аумағы артқан қаладағы қауіпсіздік мәселесін қалт жібермей қадағалау үшін мыңға тарта тәртіп сақшысы қызмет етеді. Таймерденовтің сөзіне сенсек, қазір мегаполистегі жағдай тұрақты. Соңғы он айдың қорытындысы бойынша барлық бағыттағы қылмыстар 47,5%-ға азайған.
– Атап айтқанда, қарақшылық шабуыл – 2,0 есеге, зорлау – 2,1 есеге, тонау – 2,2 есеге, бөтеннің мүлкін ұрлау – 2,4 есеге, пәтер ұрлығы – 3,0 есеге, көлік ұрлығы 2,6 есеге, көлік ішінен ұрлау фактісі – 37,5 есеге, көлік қапталындағы айналардың ұрлануы – 2,5 есеге, бұзақылық – 2,1 есеге, алаяқтық 22,5 есеге төмендеді. Сондай-ақ қоғамдық орындарда орын алатын құқықбұзушылық 2,9 есеге, көшелерде – 3,5 есеге, кәмелеттік жасқа толмағандар жасаған құқықбұзушылық – 35,3%-ға, ұйымдасқан топ – 18,9%, отбасылық тұрмыстық саладағы қылмыс 32,4%-ға азайды, – дейді Қанат Таймерденов.
Полиция департаменті басшысының сөзінше, қылмыстық құқықбұзушылық бойынша жалпы қылмыстардың ашылу көрсеткіші де көңіл көншітерлік. Нәтиже бұрынғыға қарағанда 11,6%-ға жақсарған. Әсіресе қарулы қарақшылық шабуыл, ұрлық, пәтер тонау, алаяқтық секілді азғындықпен айналысқандардың жолы кесілген.
Бірер апта бұрын қоғамдық қауіпсіздікті қамтамасыз ету бойынша учаскелік инспекторлардың жұмысын жандандыру мәселесі бойынша кеңес өткізген қала әкімі Бақытжан Сағынтаев, түрлі қылмыстардың алдын алу бойынша профилактикалық жұмыстарды күшейтуді тапсырған еді.
Кеңес барысында учаскелік инспекторлардың жұмыс нәтижелері тыңдалды. Бүгінгі таңда Алматыда 491 учаскелік инспектор мен олардың 102 көмекшісі қызмет етеді. Сондай-ақ 102 учаскелік пункт жұмыс істейді. Өткен жылы қауіпті аймақтарға орнатылған 37 модульдік полиция бекетіне биыл тұрғындар тарапынан 40 мыңға жуық өтініш келіп түскен. Жыл басынан бері учаскелік инспекторлар 5 мыңнан астам қылмыстық істі әшкерелеп, алматылықтардың 370 мыңнан астам арыз-шағымын қанағаттандырған. Нәтижесінде, 61,6 мың азамат әкімшілік жауапкершілікке тартылыпты.
Бүгінде учаскелік полиция қызметінің материалдық-техникалық базасын нығайту, полиция қызметкерлерінің мәртебесін көтеру мәселелеріне айрықша маңыз беріліп отыр. Шаһарда бұл бағытта кешенді бағдарлама қабылдау жайы да назарға алынған.
АЛМАТЫ
