Мемориалдың ашылу салтанатына құқық қорғау саласының ардагерлері мен марқұмның туыстары қатысты. Қазақстан полициясының қалыптасуы мен дамуына, қылмыспен күреске және қоғамдық тәртіпті сақтауға қомақты үлес қосқан Рүстем Есімханұлы еліміздің әр түкпірінде лауазымды қызмет атқарып жүрген құқық қорғау жүйесінің қаншама буынын тәрбиелеп шығарды. Құрметті еңбек демалысында жүрсе де қоғамдық өмірге белсене араласып, тәртіп сақшыларының жаңа буынын патриоттық рухта тәрбиелеу, ұрпақтар сабақтастығын жалғау ісіне қажыр-қайратын арнады. Бұл тақтайша тағылымды тұлғаның қайраткерлік жолын жас ұрпаққа үлгі ету мақсатында орнатылды, дейді жиылғандар.
– Еңбек жолын қарапайым тергеушіден бастаған әділет генерал-майоры Ішкі істер министрінің бірінші орынбасарына дейінгі лауазымды қызметтерді саты-сатысымен алғаусыз атқарды. Генерал болу әр солдаттың арманы болғанымен, мыңның бірінің ғана маңдайына бұйыратын бақ. Рүстем Қайдаров негізін қалап, он тоғыз жыл бойы басқарған «Генералдар кеңесі» қауіпсіздік саласындағы барлық құрылымдарға бағыт сілтейтін, ақыл-кеңесін беретін жолбасшы ұжым болды десек қателеспейміз. Аталған қоғамдық бірлестік ТМД елдері бойынша тұңғыш рет біздің елімізде құрылып, татулық тамырының тереңге тамыр жаюына сеп болды. Түбі бір бауырлас халықтарды да ынтымақ пен бірлікке ұйыстырды. Елім деп өткен ердің есімін тәлімді ұрпақ мәңгі әлдилеп өтуге тиіс, – дейді Алматы қаласы әкімі аппаратының басшысы Талғат Сәрсенбаев.
2019 жылдың аяқталуына санаулы күндер қалғанда Алматыдан жеткен ауыр хабар күллі қазақ жұртының қабырғасын қайыстырып кеткен еді. Алатаудан арқа төсіне бет алған алып ұшақ әуеге көтеріле бере тосын апатқа ұшырап, он екі отандасымыз опат болды. Тұтас елдің көңіліне тұман орнатып, ұлттық аза тұту күнін туындатқан қайғылы жағдайдан Қазақстан «Генералдар-кеңесінің» төрағасы Рүстем Қайдаров көз жұмған болатын.
АЛМАТЫ
