Әнші әжелердің ел мәдениетін дамытудағы еңбегі еленіп, жуырда ансамбль республикалық «Ардагерлер ұйымы» қоғамдық бірлестігінің Орталық кеңесі тарапынан ардагерлер ұжымы жұмысына сіңірген еңбегі мен еліміздің мәдени дамуына белсенді қатысқаны үшін алғыс хатпен марапатталды.
– «Мұнайшы» өнер ордасы өнерпаздарының жетістіктерімен жоғары белеске қол жеткізіп келеді. Тұрғындар ықыласына бөленген, ұлттық өнердің насихаттаушысы әрі жанашыры «Алтын дария» халықтық ұжымының республикалық «Ардагерлер ұйымының» алғыс хатымен марапатталуы зор жаңалық болды. Аналардың еңбектері елдік дәрежеде еленіп, халқымыздың алғысын алып отыр, – дейді Жаңаөзен қалалық мəдениет жəне тілдерді дамыту бөлімінің басшысы Ұлбазар Орынбаева.
Жаңаөзен қаласының мәдениеті – тамыры тереңдеп, жапырағы жайқалған сала. Мұнайлы қаладағы өнер ошақтары биік белестерді бағындырып жүр. Қазіргі уақытта «Мұнайшы» мәдениет үйінде 26 ұжым, 11 халықтық ұжым және 36 үйірме тұрақты түрде жұмыс атқарады. «Асыл дария» әжелер ансамблі – солардың бірі.
– Алғаш мәдениет саласына қадам басып өнер ортасына түскеннен бастап түрлі таланттардың бар екендігін көрдім. Кез келген өнер иесі үшін халықтың ыстық ықыласынан артық марапат жоқ. Халқымыздың дәстүрлі ән-күй өнерінің дәріптелуі үшін бұл ансамбльдің маңызы зор. Осы ұжымда жүріп, өлкеміздің кез келген ауқымды мәдени іс-шараларында өнер көрсетіп жүргеніме ризамын. Әріптестерімнің ортасында шынайы өнер иесіне деген құрметті иеленіп, елімнің сүйіспеншілігіне бөлену – үлкен бақыт, – деді ұжым жетекшісі Махбуза Шоманова.
Шығармашылықтың шамшырағын жарқыратып, сол арқылы дәстүр сабақтастығын жалғауды мақсат еткен әжелер қандай құрметке де лайық.
Маңғыстау облысы
