Жоғарыдағы сөзімізді тарқата кетейік, мектепке оқушыны дайындайтын – әрине мектепке дейінгі ұйым. Кейінгі кезде ата-аналардан бірінші сыныпқа баратын балаларының қатты қиналатынын естіп жүрміз. Орта білім берудің мазмұны жаңартылғанда мектепке дейінгі білімде де жаңа бағытқа қарай өзгеріс болуы керек. Міне, біз қалалық білім басқармасымен бірлесіп, сондай-ақ балабақшамызда тәрбиеші-педагогтермен осы бағытта жүйелі жұмыстарды жүргізіп келеміз. Негізінен осыдан үш жылдай бұрын Қызылорда қалалық білім бөлімінің тапсырмасы бойынша қаладағы мемлекеттік және жекеменшік балабақшалардың «№7 аймақ» деп аталатын тобы құрылды. Осы топ мектепке дейінгі ұйым қызметкерлерінің педагогикалық бағытта өзара тәжірибе алмасуына көп септігін тигізді. Әсіресе жаңартылған білім мазмұнына қатысты әдістемелік күндер тұрақты ұйымдастырылып отырды. Бұдан бөлек біз де тәрбие мен білім ұясында өзіміздің мамандарға тәжірибелік, әдістемелік сағаттарды өткіземіз.
Сол тәжірибеме сүйеніп, мектепке дейінгі тәрбие мен оқытуда жаңартылған білім мазмұнының ерекшеліктері жайындағы маңызды ойларымды айта кеткім келеді. Жаңартылған білім мазмұнында баланы бағалаудың ерекше әдісі бар, мұнда әрбір әрекетін, жетістігін, талпынысын көріп, соған сай баға беріп отыру қажет. Шын мәнінде бағалау, мадақтау, ынталандыру әдістері мектеп жасына дейінгі балалар үшін, олардың дамып, жетілуі үшін үлкен маңызға ие. Сондықтан бұл әдістерді жаңартылған мазмұнда жаңғырта жүру мектепке дейінгі тәрбие және білім берумен айналысатын кез келген педагогтің қолынан келеді.
Ал жаңартылған білім мазмұнындағы 4 дағдыны (тыңдалым, айтылым, жазылым, оқылым) әлі әріп танып, дыбысты дұрыс айта алмайтын балаларда қалыптастыру қиын-ақ. Десек те мектепке дайындалып жүрген баланың тыңдай алуы, түсінгенін, үйренгенін өзгеге айтып жеткізе алуы, сонымен қатар алдағы жазуға дайындалып шимайлай алуы және түрлі бейнелер мен формаларды, белгілерді ажыратып оқуға дайындалуы аса керек. Сол себепті осы төрт дағдыны баланың бойында балабақшадан қалыптастыруға мектепке дейінгі ұйымдардың педагогтері көп көңіл бөлгені абзал. Бұл жан-жақты қалыптасқан, мектеп табалдырығын аттайтын оқушыға қажетті дағдыларды игерген, ең бастысы ата-анасының ықпалынсыз, өз бетімен әрекет ете алатын баланы тәрбиелеуге едәуір үлкен септігін тигізеді.
Жаңартылған білім беру бағдарламасының тағы бір ерекшелігі балаға берілетін тапсырмалардың спиральді қағидатпен, яғни «шиыршық» әдісімен берілуінде болып тұр. Бұл дегеніміз – оңайдан күрделіге қарай жүріп отыру деген сөз. Сонымен қатар осы қағидатпен берілгенде жыл бойында өткен тақырыптарды үнемі қайталап отыруға да мүмкіндік береді. Мінекей, осы қағидат – зейіні әлі тұрақталмаған, бір орында байыз тауып отыруды білмейтін, тез жалығып кететін мектеп жасына дейінгі балаларды тәрбиелеуге, жаңа және қиындау нәрсені үйретуге таптырмайтын бағыт.
Жаңартылған білім мазмұнына көшу – жыл сайын емес, күн сайын өзгерістер орын алатын, дамып отырған техника мен технологияның заманында кезек күттірмейтін шешім. Мұндай қызықты да жауапты жолда әріптестеріме табандылық тілеймін!
Нұрқайым ЧИНХОДЖАЕВА,
№31 «Алтын кілт» бөбекжай-балабақшасының әдіскері
ҚЫЗЫЛОРДА
