Биліктің заң шығарушы тармағына еңбек адамының мүддесін қорғап, мәртебесін көтеруге атсалысатын адамдар кіретін болса, біздің жұмысшылардың құқығын қорғауға бағытталған ортақ күш-жігеріміз жаңа серпін алар еді. Сонымен бірге біздің әлеуметтік әріптестерімізбен ынтымақтастыққа негізделген бірлескен жұмысымыз қоғамның негізгі демократиялық құндылықтарын сақтауға мүмкіндік береді. Бірлік, әділеттік, даму – бұл Қазақстан Республикасының Кәсіподақтар федерациясы қызметінің басты қағидаттары.
Жалпы, федерация – сайлауда байқаушы қызметін атқаруда өте тәжірибелі ұйым. Былтырғы Президент сайлауында да белсенді болды. Сайлау учаскелерінің 50 пайызға жуығында дауыс беру процесінің заңға сай өтуін қадағалаған еді. Сол себепті де кәсіподақ мүшелерін бұл қызметте тәжірибесі мол деуге мүмкіндік бар. Орталық, өңірлік деңгейде болсын осы міндетті жоғары деңгейде атқаратынымызға сенім білдіремін. Байқау процесі оңай емес екені белгілі, үлкен жауапкершілік артады. Байқаушыларды қолдауда алдымызға бірнеше міндет қойып отырмыз. Дауыс беру, сайлауалды науқан кезінде жұмыс берушілердің тарапынан ешқандай қысымның, мәжбүрлі дауыс бергізудің болмауын қадағалаймыз. Байқаушылар сайлау процесінің қаншалықты заңға сәйкес өтіп жатқанын, сайлау комиссияларының, партия байқаушыларының құқық бұзушылық әрекеттерін байқаған жағдайда дереу тіркеп, есеп беруі керек. Осындай күрделі процесті байқауды жүйелі түрде ұйымдастыру да аса маңызды. Жұмысты үйлестірушілер мен байқаушылар міндетті түрде оқытамыз. Қазір мұндай шаралардың көбі онлайн өтіп жатыр. Одан бөлек ақпараттық видео роликтер дайындалады. Бұл жұмыс алдағы бір-екі аптада басталады.
Тәуелсіз байқаушылар институты кез келген демократиялық қоғамның үлкен маңызға ие бөлігі. Құрылым сайлаудағы заңсыз әрекеттерді ашық көрсетуі арқылы үлкен жауапкершілікке ие. Азаматтық қоғам, халықаралық ұйымдар болсын биылғы сайлауға деген қызығушылығы жоғары. Кәсіподақтар федерациясының мүшелері бұл процеске өз үлесін қосуға сақадай сай.
Нұрлан ӨТЕШОВ,
Кәсіподақтар федерациясы төрағасының орынбасары
