Комиссия отырысына көтерілген бірінші мәселе бойынша кейбір саяси партиялардың сайлауға жіберілуі сөз болды. Нәтижесінде, саяси партияларды партиялық тізім бойынша сайланатын Парламент Мәжілісінің және мәслихаттардың депутаттарын сайлауға жіберу туралы қаулысына өзгертулер енгізілді. Бұл мәселе бойынша Қазақстан Республикасы Орталық сайлау комиссиясының мүшесі Асылбек Смағұлов сөз алды. Ол 2020 жылғы 5 қарашада Орталық сайлау комиссиясы 6 саяси партияны сайлауға қатысуға жіберу туралы қаулы қабылдағанын еске салды. Қазақстан Республикасы Әділет министрлігінің ақпараты бойынша 2020 жылғы 11 қарашада «Бірлік» саяси партиясы қайта тіркеуден өтіп, «ADAL» саяси партиясы болып атауын өзгертсе, Қазақстан Коммунистік Халық партиясы да тіркеуден өтіп, Қазақстан Халық партиясы болып өзгерген. «ADAL» саяси партиясының және Қазақстан Халық партиясының барлық филиалдары 14 облыстың әділет органдарында, сондай-ақ Нұр-Сұлтан, Алматы және Шымкент қалаларында есептік тіркеуден қайта өткен.
Осылайша, Орталық сайлау комиссиясы қос партияны Парламент Мәжілісі мен мәслихаттары депутаттарын сайлауға қатысуға жіберу туралы қаулы қабылдады.
Күн тәртібіндегі бірінші мәселені түйіндей келе, Орталық сайлау комиссиясының төрағасы Берік Имашев «ADAL» партиясы Түркістан облысындағы филиалын қайта тіркеуден және Шымкент қаласындағы филиалын есептік тіркеуден өткізгенін атап өтті.Осылайша, партия барлық өңірлердегі мәслихаттарға сайлауға қатысуға мүмкіндік алды.
Отырысқа саяси партиялардың, Әділет министрлігінің, аумақтық сайлау комиссиялары мен бұқаралық ақпарат құралдарының өкілдері онлайн қатысты.
Одан бөлек, отырыста 29 шетелдік байқаушы тіркеуден өтті. Бұл мәселе бойынша сөз алған Орталық сайлау комиссиясының мүшесі Анастасия Щегорцова «Сайлау туралы» Конституциялық заңның 20-2-бабына сәйкес шет мемлекеттердің, халықаралық ұйымдардың байқаушыларын аккредиттеуді Сыртқы істер министрлігінің ұсынуы бойынша Орталық сайлау комиссиясы жүзеге асыратынын баяндады. Осыған байланысты Сыртқы істер министрлігі Тәуелсіз Мемлекеттер Достастығына (ТМД) қатысушы мемлекеттердің Парламентаралық Ассамблеясынан 29 байқаушыны ұсынған. Олардың барлығы аккредиттелді. ОСК мүшесі аккредиттеуге ұсыныстардың келіп түсуіне қарай байқаушылар бойынша деректер жаңартылатынын хабарлады.
