![Төрт жылда жойылған көлік көп](/media/2020/11/24/wpxrt1pf.jpg)
«ӨКМ Операторы» ЖШС мәліметіне сүйенсек, төрт жыл ішінде тозығы жеткен техникаларды өткізген қазақстандықтарға 14 млрд теңгеден астам қаржы төленген.
Сертификат бағдарламасы бойынша 54 635 автокөлік қабылданған. Нәтижесінде, отандық өндірушілерден 28 141 су жаңа автокөлік сатып алынды.
Атап өтерлігі, биыл ескі көлікті тапсырғандарға берілетін өтемақы көлемі айлық есептік көрсеткішке байланысты өсірілді. Маусым айынан бастап жеңіл көлік тапсырғандарға берілетін өтемақы 150 мыңнан 200 мың теңгеге (72 АЕК) дейін ұлғайды.
2020 жылдың 2 қарашасынан бастап «ӨКМ Операторы» ЖШС тозығы жеткен ауылшаруашылық техникасын қайта өңдеуге қабылдаудың қанатқақты бағдарламасын іске қосты. Бағдарлама аясында агротехниканы тапсырушыларға 560 мыңнан 2 млн теңге аралығындағы жеңілдік сертификатын беруді бастады.
Жаңа бағдарлама іске қосылғаннан бері 47 ауылшаруашылық техникасы қабылданды. Оның 33-і – трактор, 14-і – комбайн. Жыл соңына дейін ауылшаруашылық техникасын қабылдауға 120 квота (100 трактор және 20 комбайн) қарастырылған.
Ескі көліктерді жою бағдарламасы бойынша аймақтардан жиналған машиналар Қарағанды облысындағы зауытқа жеткізіледі. Істен шыққан көлік құралдары сол жерде қайта өңделеді. Қазіргі таңда зауыт 146 705 көлікті қайта өңдеді.