Аймақтар • 24 Қараша, 2020

«Возрождение» «Біз біргеміз!» дейді...

255 рет
көрсетілді
3 мин
оқу үшін

Облыстағы «Возрождение» немістер қоғамдық бірлестігінің әлеу­меттік жұмыстар бойынша үйлестірушісі Марина Ангальд хабар­лағандай, қоғамдық бірлестік мүшелері азық-түлікке толы себеттерді Павлодар, Ақсу қалалары, Тереңкөл, Шарбақты және Успен аудандарында тұратын ардагерлер мен зейнеткерлерге жеткізіп беріпті.

«Возрождение» «Біз біргеміз!» дейді...

Марина Ангальдтің айтуынша, «Возрождение» немістер қоғамы­ның мүшелері «Біз біргеміз!» рес­публикалық шарасына қатысып, қайы­рымдылық, жанашырлық танытып, зейнеткерлерге, ардагерлерге, аз қамтамасыз етілген отбасыларына қолдау көрсетті.

Індет тараған уақыттан бері қоғамдық бірлестік мүшелері об­лыстағы балалар үйлеріне, мек­тептерге, қиын жағдайға тап бол­ған облыс тұрғындарына жедел кө­мекке келді. Мысалы, В.Руф бас­қаратын «Рубиком» және А.Касицын басқаратын «Галицкое» серіктестіктерінің демеушілігі есе­бінен 20 миллион теңгеден астам қар­жы қайырымдылық шарасына жұмсалған.

 Железин ауданында тұратын Нина Герберт көп жыл бойы әлеу­­меттік волонтер. Осы аудан­да тұратын неміс ұлты­ның өкілдеріне әлеуметтік тұр­ғыдан жанашыр, қазір Лидия От­тоға қарасуда. Ал Людмила Си­пий болса 2015 жыл­дан бастап әлеу­меттік волонтер қатарында қы­­сылғанға қол-ұшын беріп жүр. Өңір­дегі Успен, Железин, Ертіс, Тереңкөл, Пав­лодар аудандарын­да неміс ұл­тының өкілдері тұ­рады. Людмила өзі тұратын аудан­да облыстық «Возрождение» қоға­мының негі­зінде Успенка ауылында тұра­тын жалғызілікті қарттарға, ауру жан­дарға көмектеседі. Бір­лес­тік мү­ше­­лерінің әрқайсысы «Жақы­ныңа жанашыр бол!» атты қазақ­стан­дық әлеуметтік қайырым­дылық ша­раларына қатысады.

Людмиланың айтуынша, ол «Үйдегі қамқорлық» жобасын таң­даған. Осы жоба арқылы топтағы 5 адам қарттарға көктемде картоп, кө­к­өніс егуге көмектессе, жазда бақ­­ша суарады, арам шөптерін жұ­­лады, күзде өнімдерін жинап береді.

– Міне, қазір қыс та келді. Қарт адамдарға барып үйлерінің ауласын қардан тазалаймыз, отындарын жинап береміз. Күнделікті тұрмысқа қажетті барлық шаруаларын атқарамыз. Зейнеткерлерге «Возрождение» қоғамы сыйлықтар тарту етеді, неміс ұлтының өкілдері сонау бір қуғын-сүргін жылдары қазақ жерінен пана тапты, – дейді Людмила.

«Возрождение» қоғамы төраға­сының орынбасары Ольга Литнев­скаяның айтуынша, жергілікті Ас­самблеяда ел бірлігі мақсатында атқарып жатқан өзге де жұмыстары аз емес. Бұдан басқа, қазір жалпы, «Елімізде тұрып жатқан неміс ұлтының өкілдеріне әлеуметтік-гуманитарлық қолдау көрсету» жо­басы да басталды. Өңірімізде қазір 20 мыңдай неміс ұлтының өкілдері тұрады. Қайырымдылық көмек азық-түлік себеттері, дәрі-дәрмек алуға кеткен шығындарды өтеу түрінде көрсетіледі. Көмек ең бірінші кезекте төтенше жағдай және карантиндік шектеулер кезін­де табысынан айырылған от­басыла­рына, жұмыссыздарға, бар­­лық мүгедектерге, мүгедек балаларды тәр­биелеп отырған отба­сыларға және зейнеткерлерге көр­сетіледі.

 

Павлодар облысы