Үшінші мегаполисте «Шымкент – ТМД елдерінің мәдени астанасы 2020» жылының салтанатты жабылу рәсімі өтті. Бұл мақсатта ұйымдастырылған іс-шара Абай саябағындағы поэзия және әдебиет бұрышы көрмесінен бастау алды. Кітап көрмесіне өңірлік ақын-жазушылардың туындылары қойылды. Мерекелік шара «Piano Performance», яғни орыс драма теат­ры алдында түрлі-түсті бояуларға боял­­ған пианинода орындалған музыкамен жалғасты. Мұндай күйсандық қа­ланың 5 жеріне қойылған. Ерекшелігі күйсандықта ойнай алатын кез келген қала тұрғыны өзі қалаған әуенді ойнап, келушілердің ықыласына бөленуге мүм­кіндік жасалды. Салтанатты шараның негізгі бөлігі Цитадельде өткенімен, қа­ланың көрнекті орындарында поэзия және әдебиет, театр мен кино, музыка, бейнелеу өнері және қолөнер шеберлерінің концерттері мен көрмелері көрермен на­зарына ұсынылды. Мәселен, Арбат ала­ңында жиылған қауым бес кәсіби театрдың шығармашылық ұжым­дары ұсын­ған «Қыз Жібек», «Біржан-Сара», «Айман-Шолпан», «Сайрам базары» қо­йылымдарынан үзінділер мен цирк әр­тістерінің өнерін тамашалады. Ал Абай сая­бағында «Әжелер» хоры ха­лық әндерін нақышына келтіріп орындады. Бәйдібек би алаңында қолөнер ше­берлерінің көр­месімен жалғасқан бар­лық мерекелік іс-шара Ońtústik TV және YouTube-та Bridge TV арналарында көрсетілді. Қала тұрғындары мен қонақтар Пре­зидент Қасым-Жомарт Тоқаевтың «Шым­кент 2020 – ТМД елдерінің мәде­ни астанасы» жылының салтанатты жабы­лу рәсіміне қатысушыларды құттықтауын тыңдады.

– Биыл шырайлы Шымкент шаһары Тәуелсіз мемлекеттер достастығы елде­рінің мәдени астанасы ретінде баршаға танылды. Бұл – қала тұрғындары және бүкіл Қазақстан халқы үшін зор жетістік. Осы игі бастама төл мәдениетіміз бен өне­рімізді танытып, қазақтың салт-дәс­тү­рін насихаттауға мол мүмкіндік берді. Сон­дай-ақ рухани құндылықтары сабақтас ха­лықтар арасындағы ынтымақтастық­ты одан әрі нығайтуға жол ашты. Шым­кент жұртшылығы мен өнерпаздары осын­дай мәртебелі міндетті абыроймен ат­­қа­рып шықты. Карантин талаптарына сәй­кес белгіленген жоспардағы онлайн фор­матындағы шаралар жоғары деңгейде ұйым­дастырылды. Өздеріңізге шынайы ри­за­шылығымды білдіремін!

«Мәдени астана» мәртебесін Тәжік­­станның Душанбе қаласына табыс­тағалы отырмыз. Елдеріміз арасындағы мәдениет керуені толастамасын! Досты­ғымыз бен сыйластығымыз арта берсін! Баршаңызға амандық, бақ-береке және шығармашы­лық табыс тілеймін, делінген Президент құттықтауында.

Иә, 2021 жылы ТМД елдерінің мәдени астанасы мәртебесіне Душанбе қаласы ие болып отыр. Шымкент қаласының әкімі Мұрат Әйтенов тәжікстандық делегация өкілдеріне эстафетаны тапсыра отырып, «Достық сыйы» атты топтама тарту етті. Қа­зақ халқының дарқан да қонақжай бол­­мысын білдіретін «Достық сыйына» Шым­­кенттің 2200 жылдық тарихы жа­зыл­­ған 2200 кітап, қаланың символына айнал­ған қызғалдақтың 2200 түбі және қала тұр­ғын­­дарының душанбеліктерге ыстық ле­бізі мен сәлемі жазылған 2200 ашық хат қосылған.

– «Шымкент – ТМД елдерінің мәде­ни астанасы» жылы бүкіл әлемді жайлаған пандемиямен тұспа-тұс келді. Соған қарамас­тан, осы жыл аясында шымкенттіктер өз­дерінің еңбекқор, мейірімді, достыққа адал әрі жаңашылдыққа бейім екенін көрсете білді. Карантин достығымызға сы­зат түсіре алған жоқ. Шымкент – 2200 жыл­дық тарихы бар көне шаһар. Қа­ла­мыздың тарихы ежелгі дәуірлерден бас­талатынын халықаралық беделді ұйым – ЮНЕСКО да ресми мәлімдеді. Тарихи қа­ламыздың ТМД елдерінің мәдени астанасы атануы біз үшін үлкен мақтаныш. Тұңғыш Президентіміз, Елбасы Нұрсұлтан Әбішұлы Назарбаевтың Жарлығымен шуақты Шымкентке республикалық ма­ңызы бар қала мәртебесінің берілуі абыройымызды асырды. Мемлекет басшысы Қасым-Жомарт Кемелұлы Тоқаев ел қуа­тын арттырудағы Шымкент қаласының айрықша маңызына көңіл бөлуде. Пре­зиденттің ТМД елдерінің мәдени астанасы жылының сәтті аяқталуымен арнайы құттықтауын өздеріңіз де естідіңіздер. Шым­кент қаласы тұрғындарының атынан Мемлекет басшысына шын жүректен алғыс білдіреміз. Біздің қаламыз бүгінде бүкіл Азияның өнері мен мәдени мұрасы тоғысқан ірі орталыққа айналып отыр.

Ежелгі кезеңдерден Шымкент тұр­ғын­дарының бойында ерекше қасиет қалып­тасты. Бұл – іскерлік, қонақжайлылық жә­не өзгеріске деген бейімділік. Шымқала то­пырағынан түлеп ұшқан әр азаматтың бо­йында елге деген сүйіспеншілік, дәстүрге деген беріктік, достыққа деген адалдық ор­ныққан. Мәдени астана шеңберінде қала­мызда 1700-ден астам жаңашыл, онлайн форматтағы жобалар жүзеге асты. Қа­ламыздың мәртебесін арттырған осы іс-шараларды өткізуге көмекші болған барлық шымкенттіктерге алғысымды біл­діремін! Карантин біздің ғасырларға жалғасқан халықаралық байланысымыз­ды ажырата алған жоқ. Оқшаулану кезінде де достығымыз бен ынтымағымыздың және бекем бірлігіміздің нәтижесінде сын­дарлы сәттен сүрінбей өттік. Біз бүкіл ТМД елдеріне ортақ рухани құндылықтар – мәдени-әдеби, тарихи мұраларымыз­ды насихаттау мен байланысымызды нығай­ту үшін топтаса білдік.

Достық эстафетасын Ұлы Жібек жо­лымен бауырлас ел Тәжікстанның астанасы Душанбеге жолдаймыз. Қазақ хал­қының ұлттық дәстүрінің ізімен эстафета керуенін 2200 жылдық тарихы бар Шым­кенттен тарту-таралғымен шығарып салғалы отырмыз, деді қала әкімі.

Үлкен сенім мен жауапкершілік ар­­тылған абыройлы жылды осылай қо­ры­­тындылаған Шымкент қаласының әкімі Мұрат Әйтенов ТМД елдерінің мә­дени астанасы эстафетасын Душанбе қа­ла­сы­ның төрағасы Рустами Эмомалиге та­быс етті. Сондай-ақ онлайн-жиын­да ТМД Атқарушы комитетінің төр­ағасы – Атқарушы хатшы С.Лебедев, Мем­ле­кетаралық гуманитарлық ынтымақ­тас­тық қоры басқарма төрағасы, Әзер­байжан Республикасының Ресей Фе­де­рациясындағы Төтенше және өкі­лет­ті елшісі Полад Бюльбюльоглы қала тұр­ғындары мен қонақтарына арнайы мере­келік құттықтау тілегін жеткізді. Мә­дени астана жылының жабылуы аясында 6 ­театр, 5 кітапхана, цирк, зообақ, әдет-ғұ­рып және салт дәстүр орталығы, Мәде­ниет үйі және басқа да мәдениет мекемелері­нің шығармашылық ұжымдарының күшімен 48 спектакль, 99 онлайн іс-шара, 7 жыл­жымалы театрлық, 5 музыкалық пер­фо­­манстар, ақындар, жазушылар, әде­би қай­раткерлер бейнесіндегі бойлы қуыр­шақтар шеруі, жас суретшілердің көрмесі мен ғи­мараттардың қасбеттерінде 7 му­рал­дың тұсаукесері ұйымдастырылды.

Айта кетейік, ұйымдастырылған шаралар карантин талабын сақтай отырып, барлық келушілерге сақтық жөнінде ескертпелер жиі ескертіліп отырды.

ШЫМКЕНТ