Саясат • 27 Қараша, 2020

Еңбек адамының таңдау құқығын сақтау маңызды

108 рет
көрсетілді
3 мин
оқу үшін

Келер жылдың 10 қаңтарына белгіленген Қазақстан Республикасы Парламенті Мәжілісінің және мәслихаттарының депутаттарын сайлаудағы Қазақстан Республикасы Кәсіподақтар Федерациясы (ҚРКФ) байқаушылары республикалық штабының бірінші отырысының қорытындылары бойынша брифинг өтті.

Еңбек адамының таңдау құқығын сақтау маңызды

ҚРКФ байқаушылары респуб­ликалық штабының төрағасы – Кә­сіп­одақтар федерациясы төрағасының орынбасары Нұрлан Өтешев 26 қара­ша­дағы жағдай бойынша ҚРКФ мен оның мүшелік ұйымдарынан 5 762 тәуел­сіз байқаушы тіркелгенін, олар да­уыс беруді республика бойынша 3 726 сай­лау учаскесінде бақылайтынын атап өтті.

– Қазақстан Республикасы Кәсіп­одақ­тар федерациясы атқару комите­тінің 6 қарашадағы шешімімен кәсіп­одақтар сайлау процесіне байқаушылар ретінде қатысады. Біз алдымызға екі мін­дет қойдық – ұзақ мерзімді және қыс­қа мерзімді. Біріншіден, біз үшін азаматтардың өз таңдауын жасау еркін­дігі жұмыс берушілер өкілдерінің тара­пынан қандай-да бір қысыммен бұзыл­мауы маңызды. Екіншіден, біз сайлау процесінің елдің заңнамасына сәйкес өтуін байқаймыз, – деп атап өтті ол.

Республикалық штабтың мүшесі – «Мем­лекеттік, банк мекемелері және ха­лыққа қызмет көрсету қызмет­керлерінің қазақстандық кәсіподағы» қоғамдық бірлестігі төрағасының орын­басары Атақозы Нұрланов аталған салалық кәсіп­одақтың Кәсіп­одақтар Федера­циясының ең ірі мүшелік ұйымдарының бірі және әрқа­шан елдегі ең маңызды ішкі саяси процестердің алдыңғы қатарын­да еке­нін жеткізді. Оның айтуын­ша, қазіргі кезде салалық кәсіп­одақ, оның филиал­дары мен жергілікті кәсіп­одақ ұйым­дарының мүшелері байқау­шы­лардың облыстық және аумақтық штабының құрамына кірді.

– Ынтымақтастыққа негізделген әлеуметтік әріптестерімізбен бірлескен жұмыс бізге еңбек адамының сайлау бос­тандығына конституциялық құқы­ғы сияқты негізгі демократиялық құн­ды­лықтарды сақтауда айтарлықтай жетіс­тіктерге жетуге мүмкіндік береді, – деді А.Нұрланов.

Өз кезегінде Республикалық штаб­тың мүшесі – «Қазақстандық білім және ғылым қызметкерлерінің сала­лық кәсіподағы» ҚБ төрайымының орын­басары Әлия Әбиева журналистерге аталған салалық кәсіподақтың ҚРКФ-ның ірі мүшелік ұйымдарының бірі екен­дігін, оның мүшелері де байқау­шы­­лардың республикалық және аймақ­тық штабтарының құрамына кірге­нін айтты.

– Біздің салалық кәсіподақ Кәсіп­одақтар федерациясының сайлау күні сайлау процестерінің ашықтығын ба­қылауды қамтамасыз ету жөніндегі бастамасын қолдайды. Біз сайлаудың ашық, еркін және демократиялық түрде өтуі үшін байқаушылар ретінде бұған ықпал етеміз, – деді Әлия Әбиева.

Нұр-Сұлтан қаласы бойынша аймақтық штабының мүшесі – «Senim» денсаулық сақтау жүйесі жұмыс­кер­лерінің салалық кәсіптік одағы» РҚБ елордалық филиал төрағасы Руслан Сатыбалдиевтің айтуынша, астанадағы 248 сайлау учаскесінде сайлау барысын жүзден астам кәсіподақ мүшесі бақылайтын болады.

Нұр-Сұлтан қаласы бойынша ай­мақ­тық штабының мүшесі, Мәдениет, спорт және ақпарат қызметкерлерінің Қазақстандық салалық  кәсіподағының бастауыш кәсіподақ ұйымының мүшесі Зейнегүл Базанова болса, сайлау нау­қанына алғаш рет байқаушы ретінде қатысатынын мәлімдеді. Бүгіннен бастап Кәсіподақтар федерациясы аумақтық байқаушылар штабының мүшелері үшін бірқатар онлайн-оқыту семинарларын өткізеді.

Еске салайық, Қазақстан Прези­денті Қасым-Жомарт Тоқаевтың Жар­лығымен Қазақстан Республикасы Пар­ламенті Мәжілісі және мәслихаттары депутаттарының сайлауы 2021 жылдың 10 қаңтарына белгіленді.