Ең қысқа әңгіме • 01 Желтоқсан, 2020

Елбасы, Луиза және балмұздақ

51 рет көрсетілді

Елбасымен кездесу талай адамның (үлкеннің де, кішінің де) өмірінде айрықша елеулі із қалдырғаны анық. Сондай бір жай тоқсаныншы жылдардың басында меркілік Луиза Ерсінқызы Мірәлиеваның да басынан өткен еді.

Instagram парақшасынан алынды

«Бар-жоғы жеті жастамын. Аудан тұрғындарының Мем­лекет басшысымен кезекті бір кездесуіне әкеме еріп бардым. Ол кісі қазіргі Андас батыр ауы­лындағы аудандық электр жүйесіне қарасты бөлімшені бас­қаратын еді. Алғашында «Бала-шаға баратын жиналыс емес» деп мені онда апарғысы келмеген. «Нұр-атаны жақыннан көргім келеді» деген өтінішіме құлақ асты, ақыры», – деп сол кездесуді күлімсірей есіне алды ол.

Кішкене қыз жиында айтыл­ған жайлардың бірін түсінді, бірін түсінбеді. Не де болса Нұрсұлтан атасын жақыннан көргеніне мәз. Жиын біткеннен кейін де жұрт­тың Елбасын ортаға алып, құр­мет көрсетуі жалғасқан. Сол тұс­та үлкен кісі көпшіліктің ортасын­да әркімге бір қарап, жаутаңдау­мен тұрған мұны көріп қалып, қасына шақырып: «Атың кім?» – деп сұрайды. «Луиза». «Нешінші сыныпта оқисың?». «Бірінші». Елбасының өзімен ашық сөйлесуі, мейірімді жүзі, жылы көзқарасы баурады ма, қаршадай қыз ендігі бір сәтте тосырқауын қойып: «Ата, біз сізді жақсы көреміз. Сіз­ге денсаулық тілейміз. Сіз жақсы адамсыз», – деп көңіліндегі ізгі тілегін де жеткізеді. Бәрінен де қызығы – кішкене қыздың қызды-қыздымен «Қашан біздің ауылда балмұздақ болады? Менің көп-көп «мороженое» жегім келеді» деп мәселені қабырғасынан қой­ғаны болды. Жұрт ду күлісіп, оның батылдығына риза болып, шапалақ ұрып та жіберді.

Елбасына да Луизаның алғау­сыз көңілмен айтқан сөзі ұнай түскен секілді. Жайдарылана кү­ліп, оны қолына алып көтеріп, маң­дайынан сүйіп: «Бәрі де болады, қызым. Тек сабағыңды жақсы оқы. Жарай ма? Бақытты бол!» – деп батасын берген еді. Луиза да Нұр-атасына сабағын тек жақсы бағаға оқуға уәде етті. Көп өтпей оның өтініші де орындалған. Сол жаз­да қырғыз елімен шекаралас шал­ғай ауылға аудан орталығы­нан автодүкендер күн құрғатпай қа­тынап, балмұздақ дегеніңді үйіп-төгіп әкеліп, са­ту­мен болып­ты. Әсіресе, кішкен­тайлар бір жырғаған. Олар мұ­ның өз құрдастары Луизаның «қоғамдық белсенділігінің» же­місі екенін де білмеді.

Ең бастысы, сол күнгі кездесуден бастап Луизаның көңілінде ілкі өзгерістер орын алады. Ел­ба­сының сол жолы айтқан сөзі өзін ұдайы биіктерге талпын­дырып, әлі күнге жолын нұр­лан­дырумен келе жатқандай се­зінетіні бар. Қалайда айтқан уәдесінің үдесінен шығуға күш салды. Победа ауылындағы №21 орта мектепті «Алтын белгіге», Тараз мемлекеттік университетін «Қаржы және несие» мамандығы бойынша үздік дипломға бітіреді. Осы оқу орнынан екінші жоғары білім – «Халықаралық құқық бакалавры» мамандығын да қоса меңгеріп шыққан.

Ол алғашқы еңбек жолын «Қаз­коммерцбанк» АҚ Тараз бөлім­шесінде есепші-операцияшы болу­дан бастап, Шымкенттегі «Alyance Retail Group» ЖШС-нің несиелеу менеджері, бөлім басшысы, «Оңтүстік» әлеуметтік кәсіпкерлік корпорациясы ұлттық компаниясы АҚ-ның менеджері, серіктес компаниялардағы бизнес үдерістерін әкімшіліктендіру басқармасының басшысы, «Asyl Arman» корпорациясы» ЖШС-ның қаржылық директоры секілді қызмет баспалдақтарынан өтіпті. Бүгінде «Сбербанк России» АҚ Шымкент филиалының кредиттік менеджері екен.

Отбасында Дильназ, Ди­нара, Ақназар, Санжар есімді пер­зент­тері желкілдеп өсіп келеді. Бір кездегі Елбасы бата-тілегінің қа­был болып, өмірде өркен жайып, қызметте өсуіне шарапаты ти­генінің бір көрінісі осындай.

Қазір еліміздің барлық өңі­рінде де жағдай жақсы ғой. Әсі­ресе, балалар не ішем, не кием де­мейді. Луизаның кейде осы кіш­кентайларына Шымқаланың ші­ліңгір шілдесінде шөл бассын деп тәтті балмұздақтар алып беріп, ал­дарқататыны бар. Сол тұста бағ­зы бір кездегі «балмұздақ оқи­ғасы» есіне түсіп, Елбасына деген ризашылық сезімі көкірегін кер­неп-ақ кетеді.

       

Баймаханбет АХМЕТ,

журналист

 

Тараз

 

Соңғы жаңалықтар

«Сары аймаққа» қайта оралды

Аймақтар • Бүгін, 07:22

Шығыс – «жасыл аймақта»

Аймақтар • Бүгін, 07:20

«Қызыл аймақтың» қаупі басым

Аймақтар • Бүгін, 07:17

Қыстың қамын жаз ойла

Үкімет • Бүгін, 07:13

Алғашқы ұстаз ізімен

Білім • Бүгін, 07:10

Кофе және әдебиет

Әдебиет • Бүгін, 07:07

Ұқсас жаңалықтар