Иман ұялаған ауыл

Ауыл ақсақалдары кеңесе келе, бос тұрған бір үйді мешіт етіп қайта жаб­дықтауды қолға алды. Төбесіне көзтар­тарлықтай етіп күмбез орнатылды. Ішкі бөлмелері жамағат жиналғанда намаз оқуға, жаназа шығаруға лайықталып қайта бөлінді. Басқаша мүмкіндік болмаған соң осылай лаждаған. Ал мешіт өте қажет еді. Бұрыннан ынтымағы бекем, бұра тартар тентек-телісі, ала жіптен аттайтын суық қолдылары да жоқ ауыл тұрғындары ша­рапаты мол иманға ұйыса, бірлік бүгін­гіден де бекем бола түсер еді.

2012 жылы ауыл имамы Саты­балды Әбдірашұлы ел ақсақал­дары­мен жаңа істің жай-жапсарын сана­ларымен сал­мақтап, егжей-тег­жей­лі кеңесе келе, жаңа мешіттің құры­лысын бастауға бел буды. Ел ертеңін ойлаған ұйымшыл жұрт бір­ден келісе кетті. Осы ауылдан түлеп ұш­қан, теп­кен тасы өрге домалап тұрған кә­сіп­к­ерлер де қолдады. Сөйтіп, 2013 жы­лы жаңа мешіттің құрылысы бас­талды. Құрылыс жұмыстарын ұйым­дастыруға ел­ге жанашырлығы мол Нұрлан Ыбыраев, Мүтәлап Жұ­манбаев, Балташ Қосыбаев, Ермек Бек­баев тәрізді азаматтар көп еңбек сіңірді.

Мәселенің бәрін қаржы шеше­тіні бел­гілі. Бұл тарапта да аса көп қиындық бола қойған жоқ. Жапа­ровтар мен Мер­генбаевтар әулеттері жә­не осы ауылдың перзенттері Бауыр­жан Елубаев, Мыр­забай Әбді­халықов сынды азаматтар қомақты қар­жы бөлді. Қалғанын ауыл тұрғын­дарының өздері көтерді. Осындай ынтымақтың нәтижесінде 10 млн теңге көлемінде қаражат жиналды.

Ортақ іске ауыл тумасы, «Азия Фильтр» серіктестігінің басшысы Ин­дира Ыбыраева 2 млн теңге кө­лемінде кө­мек көрсетіп, ауыл азаматтары тайлы-таяғымен түгел жиналып, жаңа мешіттің шатырын жауып, алыстан көз тартатын көрнекті күмбез орнатты. Биыл жазда осы ауыл­дан түлеп ұшқан түлектер арасында өткен «Жақсылық жасаудан жарысайық» эстафетасына қатысушы Жомарт Бал­ташев пен Бауыржан Әбдіхалықов баста­ған азаматтар 800 мың теңге қаражат жи­нап, жаңа мешітке су құбырын тартып, ішіне жылы еден орнатып, жөндеу жұмыстарын тап-тұйнақтай етіп жасап берді.

Қазір ауылдағы еңсесі биік құл­шылық үйі имандылық ұйыған ауыл­дың рухани байлығын еселеу­ге септігін тигізіп тұр. Бұл да – ел бір­лігін ойлаған, жақынына жа­нашыр бола алатын жамағаттың өне­гелі ісі.

Ақмола облысы,

Бурабай ауданы