Бүгінде облыс орталығының аумағы бойынша 6 және Степногорск қаласының маңында 3 санитарлық бекет жұмыс істеуде. Онда карантин талаптарының сақталуын қадағалау шараларына 66 полиция қызметкері жұмылдырылған. Брифингте Әсет Байтеленов санитарлық бекеттерде тұрған полиция қызметкерлері электрондық планшеттермен қамтамасыз етілгенін және қалаларға кіріп-шығатын көліктер арнайы электронды база арқылы тексеріліп отыратынын айтты.
Осындай тексерістердің нәтижесінде 130 әкімшілік құқық бұзушылық анықталған. Санитарлық бекеттерден өту кезінде санитарлық талаптарды бұзғаны үшін 25 жүргізуші жауапкершілікке тартылған. Сондай-ақ, жүргізуші куәлігінен айырылса да, санитарлық бекеттерден өтпек болған жүргізушілер де кездескен. Көкшетау қаласының маңындағы санитарлық бекетте полиция қызметкерлері сондай 12 жүргізушінің жолын кескен. Мас күйінде көлік жүргізген екі жүргізуші, қауіпсіздік белдігін тақпаған 24 жүргізуші жауапқа тартылған. 20 автокөлік мамандандырылған айыппұл тұрағына қойылған.
Өз сөзінде баяндамашы үстіміздегі айда Нұр-Сұлтан – Петропавл тас жолында орналасқан №1 санитарлық бекетте жергілікті полиция басқармасы мен көлік бақылау инспекциясы бірлесіп, жолаушыларды заңсыз тасымалдаған такси жүргізушісін ұстап, әкімшілік хаттама толтырғанын, карантин аймағына өтуге рұқсаты жоқ көліктерді кіргізбеу және шығармау мақсатында тиісті жұмыстар жүргізіліп жатқанын айтты.
Ақмола облысы
