Нақтырақ айтсақ, есірткі сатудың – 61, аса ірі көлемде есірткі сақтау – 20, есірткі контрабандасы – 29, ал есірткі өсімдігін заңсыз егіп-өсірудің 75 дерегі анықталған. Сондай-ақ заңсыз айналымнан 6 тонна 719 кило есірткі заты тәркіленді. Облыстық Полиция департаменті баспасөз қызметінің дерегінше, сотқа 154 іс жолданып, 147 тұлға қылмыстық жауапкершілікке тартылған. Мәселен, Есірткі қылмысына қарсы іс-қимыл басқармасының қызметкерлерімен жүргізілген жедел-іздестіру жұмыстары барысында қараша айында Мақтаарал ауданы тұрғынының 6 грамм марихуананы сатқаны анықталып, құрықталды. Оның үйіне тінту жүргізу кезінде 8 дана сіріңке қорабы және қағазға оралған жалпы салмағы 21 грамм марихуана тәркіленді. Күдікті қамауда. Одан бөлек 6 грамм марихуана сатқан Келес ауданының тұрғыны анықталып, ұсталды. Тінту жүргізу кезінде оның үйінен 1 дана қағазға оралған салмағы 23 грамнан асатын марихуана есірткі заты тәркіленді. Сонымен қатар Төлеби ауданының тұрғыны да есірткі сатып ұсталған. Аталған қылмыстық істерге қатысты Қылмыстық кодекстің 297-бабымен «Есірткі, психотроптық заттарды, сол тектестерді өткізу мақсатында заңсыз дайындау, қайта өңдеу, иемдену, сақтау, тасымалдау, жөнелту не өткізу» бойынша тергеу амалдары жүргізілуде.
Сарыағаш АПБ-нің патрульдік полиция инспекторлары рейдтік жұмыстарын жүргізу барысында күмән тудырған автокөлікті тоқтатқан. Тексеру кезінде автокөліктің ішінен аңшы мылтығы мен көлікте отырған жолаушы ер азаматтың қалтасынан пакетке оралған хош иісі бар есірткіге ұқсас өсімдік табылып, заттай дәлелдеме ретінде тәркіленген. Аталған жайт Қылмыстық кодекстің 296-бабы «Есірткі, психотроптық заттармен, сол тектестермен өткізу мақсатынсыз заңсыз жұмыс істеу» бойынша тіркелді. Сараптамаға сәйкес, тәркіленген есірткі салмағы шамамен 3 грамм болатын «кептірілген марихуана» болып шықты. Осы оқиға бойынша қазіргі таңда тергеу амалдары жүргізілуде. Есірткіге қатысты тағы бір оқиға осы ауданда орын алып отыр. Сарыағаш АПБ кезекші бөлімінің «102» пультіне «Жібек жолы» шекара бекетінде есірткі контрабандасының іс-әрекеті анықталғаны туралы хабарлама келіп түсті. Бұл оқиғада полицейлерге Нано атты қызметтік ит көмектескен. Яғни иісшіл ит өткізу пунктінен өту кезінде шетелдіктердің біріне белгі берген. Жедел уәкілдер күдікті Өзбекстан азаматын тінту кезінде күртешесінен есірткі затына ұқсас түйіншекті тауып, тәркіледі. Тәртіп сақшылары ұсталған азаматты аудандық полиция бөліміне жеткізді. Сараптамаға сәйкес, алынған өсімдік тектес зат салмағы 1 грамнан асатын «кептірілген марихуана» болып шықты. Қазіргі уақытта аталған жайт бойынша Қылмыстық кодекстің 286-бабы «Айналымнан алынған заттардың немесе айналысы шектелген заттардың контрабандасы» бойынша сотқа дейінгі тергеу амалдары жүргізілуде. Күдікті қамауға алынған.
Есірткіге қарсы күресті бәсеңдетпеген тәртіп сақшылары облыс тұрғындарын зиянды әдеттерден бас тартып, салауатты өмір салтын ұстануға шақырады. Сондай-ақ есірткі заттарын заңсыз сақтағаны, өткізгені, өсіргені және контрабандасы үшін қылмыстық жауапкершілік қарастырылғанын үнемі ескертіп келеді.
Түркістан облысы