Қазақстан Халық партиясының атынан Қазақстан Республикасы Парламенті Мәжілісінің депутаттығына кандидаттар Жамбыл Ахметбеков пен Ирина Смирнова Шығыс Қазақстан облысының орталығы Өскемен қаласындағы Қаржы-экономикалық колледждің ұжымымен және оқушыларымен кездесу өткізді. Кездесуде партияның бағдарламасында қамтылған мәселелер талқыланды әрі күн тәртібіне жас отбасыларды қолжетімді ипотекамен қолдау мәселесі қойылды.
Спикерлердің пікірінше, қазір мемлекет жастардың дамып, жетілуі үшін олардың барлық әлеуметтік-тұрмыстық мәселелерін шешіп, тұрғын үймен қамтамасыз етуі керек.
Ирина Смирнова Қазақстандағы жастардың үлесі халықтың едәуір бөлігін құрап отырғанын айтты.
– Соңғы ресми мәліметтерге сәйкес, елдегі 15 пен 34 жас аралығындағы жастардың саны 5 миллионнан асады және осыншама мөлшерде 14 жасқа дейінгі балалар бар. Үкіметтің алдында жас қазақстандықтарға білім алуға, жұмыс орнын табуға және жеке тұрғын үй сатып алуға көмектесу міндеті тұр, – деді Ирина Смирнова.
Төменгі палата депутаттығына кандидаттар қазіргі жастардың негізгі екі проблемасы бар екенін атап өтті. Олар – жұмысқа орналасу және жеке тұрғын үймен қамтамасыз ету.
– Біз азаматтардың барлық санаты үшін, оның ішінде жастар мен жас отбасылар үшін жыл сайын жеңілдетілген тұрғын үй салуға заңнамалық кепілдік берілген квоталарды бекіту қажет деп санаймыз. Қазақстан Халық партиясы еліміздің барлық мұқтаж азаматына лайықты өмір сүру деңгейін қамтамасыз ету үшін мемлекетіміздің жеткілікті ресурстарға ие екендігіне сенімді, – деді Жамбыл Ахметбеков.
Кездесу спикерлері Қазақстандағы қолданыстағы тұрғын үй бағдарламалары жастар үшін қолжетімсіз екенін, оларды жастар мен жас отбасылардың пайдасына қарай өзгерту қажет екенін еске салды.
Бұған қоса, Парламент Мәжілісінің депутаттығына Қазақстан Халық партиясының атынан кандидаттар Жамбыл облысына барды. Онда Тараздағы 2019 жылдың 27 ақпанында жарылыс болған тұрғын үй тұрғындарымен кездесу өтті.
Еске сала кетейік, аталған жарылыстан үш пәтер түгелдей қирап, 4 адам қайтыс болған. Үй тұрғындары әкімдік өкілдерінің пәтерлерді қалпына келтіруді мойнына алғанын жеткізді. Алайда пәтерлерге жүргізілген жөндеу жұмыстарының сапасы нашар.
Партия өкілдері сонымен қатар Шымкент қаласындағы апатты жағдайда тұрған үйде болды. Мұнда зейнеткерлер мен көп балалы отбасылар тұрады.
Жалпы, Парламент Мәжілісінің депутаттығына Қазақстан Халық партиясының атынан кандидаттар сайлауалды үгіт-насихат жұмыстарын белсенді жүргізуде.
