«Нұрлы жер» бағдарламасының сапалы орындалуы облыс басшылығы тарапынан қатаң бақылауға алынған. Бағдарлама аясында мемлекеттік бюджет есебінен 158 нысанның құрылысына 36,6 млрд теңге бөлінді. Қаржы 40 арендалық тұрғын үй, 30 инженерлік инфрақұрылым нысаны, 89 кредиттік тұрғын үйдің құрылысына бағытталды.
Жыл қорытындысы бойынша 69 нысан пайдалануға тапсырылады. Нәтижесінде 2430 отбасы баспанамен қамтамасыз етіліп, 3604 жеке жер учаскелеріне инфрақұрылым жүйелері жүргізілетін болады. Мемлекеттік бюджет есебінен 1778 пәтерлі сатып алу құқығынсыз арендалық 40 көп қабатты тұрғын үйлердің құрылысы жүргізілуде. Ал арендалық 14 тұрғын үй пайдалануға тапсырылды.
Сондай-ақ облыс аумағында әлеуметтік кредиттік тұрғын үйді дамыту мақсатында 7 қабатты 24 тұрғын үй салынуда. Нәтижесінде 1452 отбасы қоныс тойын тойлайтын болады.
Сонымен қатар Түркістан қаласы әкімшілік іскерлік орталығында жаңадан 7, 9 және 12 қабатты 64 тұрғын үй салынуда. Облыс әкімдігі баспасөз қызметінің мәліметіне жүгінсек, елімізде баспанамен қамтамасыз ету бойынша ең жоғары көрсеткіш Түркістан облысына тиесілі.
