Сондай-ақ облыс әкімі жауапты басқарма басшыларымен бірге әкімшілік-іскерлік орталықта салынып жатқан 7,9 және 12 қабатты жалпы 89 тұрғын үйдің құрылыс алаңында болды. Жеті қабатты 7 үйдің құрылыс-монтаж жұмыстары аяқталып, банк арқылы берілген. Ал 24 тұрғын үйдің аумағына су, газ, электр қуаты, кәріз жүйесімен жабдықтау, абаттандыру жұмыстары жүргізілуде. Басым бөлігінде арнайы жерасты автотұрақтар болады.
«Әзірет Сұлтан мұражай-қорығының» аумағы да абаттандырылуда. Ботаникалық бақ, екі бірдей аллея, декоративті тоған құрылысы қарқынды жүруде. Жоспар бойынша мұнда мыңға жуық, оның ішінде Германия және Бельгия елдерінен арнайы әкелінген көшеттер, Өзбекстаннан сатып алынған тұт, қарағай, шие, алма, каштан ағаштары отырғызылады. Сондай-ақ 18 мың бұталар мен Германиядан сатып алынған 14 мың ландшафты және альпинистік раушан гүлдері мен су лалагүлдері егіледі. Топырақты құнарландыру үшін сала мамандары кешенді жұмыстар жүргізуде. Саябақтар жарықтандырылып, тастар төселіп, кесене аумағы оазиске айналады.
Түркістан облысы
