Партияның сайлауалды бағдарламасында ауылды кешенді дамыту, жастарды қолдау жан-жақты қамтылған. Мәселен, партия бағдарламасында жас отбасыларға тұрғын үй алуға және тұрғын үй жағдайын жақсартуға, ал ауылға көшіп барғандарға үй алуға және үй шаруашылығын қалыптастыруға, ауылда бизнес ашуға пайызсыз несие беру бағдарламасын енгізу көзделген.
Кездесуде сөз сөйлеген Қанат Тасыбеков бұл бастама жүзеге асатын болса ел тірегі ауыл жастарының әлеуметтік мәселелерінің шешілуіне тікелей жол ашылады деп есептейтінін жеткізді. «Еліміздің жастары мемлекеттің болашағы деп айтып жүрміз. Бұл тек қала жастарына қатысты емес екені түсінікті. Демек, ауылды жерлердегі жастарға да лайықты қолдау болуы тиіс. Ол үшін партия ауыл жастарының білім грантын алуына және жұмысқа орналасуына кепілдік беретін «Ауылдан – диплом алу үшін» бағдарламасын әзірлеуді ұсынып отыр. Сонымен қатар, жоғары және орта арнаулы аграрлық оқу орындарының түлектері үшін алғашқы жұмыс орнын міндетті квоталау тәжірибесін енгізу қажеті деді Қанат Тасыбеков.
Ал кандидат Дәурен Қуат «Ауыл» партиясының сайлауалды бағдарламасында балалы отбасыларға арналған тиімсіз, қысқа мерзімді төлемдердің орнына кепілдендірілген «Бала нәсібі» жәрдемақысын енгізіп, оны 18 жасқа толғанша төлеу ұсынылып отырғанын айтты. «Мұндайға мемлекетіміздің толық мүмкіндігі бар деп есептеймін. Бұл іске асатын болса ауыл тұрғындарының әлеуметтік әлеуеті жақсарып, өмір сапасын жақсартуға болады», деді Д.Қуат.
Сонымен қатар кездесу барысында ауыл шаруашылығы өнімдерін өндіру ісімен айналысып жатқан кәсіпорындар мен фермерлерді қолдау мақсатында оларды қосымша құн салығынан босатып, несиелерді арзандатуды көздейтін субсидия түрлерін бесеуге дейін қысқарту бастамасы партияның бағдарламасына еніп отырғаны айтылды. Кездесу барысында зиялы қауым өкілдері партияның бастамалары ауыл тұрғындарының ғана емес, жалпы жұртшылықтың көңілінен шығады деп есептейтіндерін айтты. Партияға алдағы сайлауда сәттілік тіледі.
Сонымен қатар Нұр-Сұлтан қаласы бойынша «Ауыл» ХДП өңірлік қоғамдық штабының басшысы Өмірбек Жұмағұлов, аудандық штаб басшылары – Серік Оспан, Алпысбай Жұмаев, Нұр-Сұлтан қаласы мәслихатының депутаттығына кандидаттар – Ғабит Байханов, Фархат Энгишев «Саянұр» базарында болып, жаңа жыл қарсаңында азық-түлік тауарларының бағасына мониторинг жасап, «Ауыл» партиясының сайлауалды бағдарламасы бойынша түсіндіру жұмыстарын жүргізді.
Шығыс Қазақстан облысы Глубокое ауданының Солнечное ауылында аудандық мәслихат депутаттығына үміткер А.Шораев бастаған «Ауыл» партиясының үгіт тобы «Жамбусинов» ЖК ұжымымен кездесті.
Қостанайда онлайн форматта «Ауыл» партиясынан Мәжіліс депутаттығына кандидат В.Хадановичтің Қостанай облысы ауылдарының тұрғындарына партияның сайлауалды бағдарламасын түсіндіру бағытында кездесуі өтті. Кездесу барысында қатысушылар ауылдық аумақтардың инфрақұрылымын жаңғырту мәселелерін талқылады.
