413,7 мың адам жұмысқа орналасты
Еңбек және халықты әлеуметтік қорғау министрлігінің ақпараты бойынша, осы жылдың 11 айында 621,4 мың қазақстандық Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған «Еңбек» мемлекеттік бағдарламасының қатысушысы болды. Бұл арқылы 413,7 мың адам жұмысқа орналастырылса, оның ішінде 269,2 мың адам тұрақты жұмысқа тұрды. 206,5 мың адам субсидияланатын жұмыс орындарымен қамтылды, оның ішінде 19,1 мың адам әлеуметтік жұмыс орындарына, 34,1 мың адам жастар практикасына, 153,3 мың адам қоғамдық жұмыстарға орналастырылды. Еңбек ресурстарының ұтқырлығын арттыру мақсатында биыл 1 желтоқсандағы жағдай бойынша жұмыс күші мол өңірлерден 5 665 адам, яғни 1 610 отбасы қоныс аударды. Қысқа мерзімді оқыту курстарына 18,7 мың адам жіберілді, техникалық және кәсіптік білім беру бойынша оқытумен 18,4 мың адам қамтылды.
«Мемлекеттік бағдарлама аясында жыл басынан бері жаппай кәсіпкерлікті дамытуға 12 647 микрокредит берілді, оның ішінде ауыл тұрғындарына 11 162 микрокредит берілді. Микрокредит алушылар 13 585 жұмыс орнын ашты. Сондай-ақ бағдарламаға қатысушыларға жаңа бизнес-идеяларды жүзеге асыру үшін 200 АЕК мөлшерінде 43 мыңнан аса мемлекеттік грант беріледі. 1 желтоқсанда 42,4 мыңнан аса грант бөлініп үлгерді. Бұған қоса 33,2 мың адам «Бастау Бизнес» жобасы бойынша кәсіпкерлік негіздеріне оқытудан өтті», делінген министрлік таратқан мәліметте.
Айта кететін жайт, Жұмыспен қамтудың 2020-2021 жылдарға арналған жол картасы шеңберінде 6,7 мың жобаны іске асыру басталды, онда 130 мың теңгелік орташа жалақымен 220,7 мың адам жұмыспен қамтылған. ЖҚЖК инфрақұрылымдық жобаларын іске асыру 4 негізгі бағыт бойынша өтеді. Бұл – әлеуметтік-мәдени нысандарды, тұрғын үй-коммуналдық шаруашылық нысандарын, сондай-ақ инженерлік-көлік инфрақұрылымын күрделі және ағымдағы жөндеу, реконструкциялау, елді мекендерді абаттандыру.
ЖҚЖК инфрақұрылымдық жобаларын іске асыру кезінде отандық өндірушілердің кемінде 90%-ының тауарлары мен қызметтерін қолдануды қамтамасыз ету – ерекше шарт. Жұмысшылардың кемінде жартысын жұмыспен қамту орталықтары арқылы жалдайды, басымдық жұмыссыз жастарға беріледі. Мердігерлер санитарлық-эпидемиялық шараларды қолдана отырып, қауіпсіз еңбек жағдайын қамтамасыз етуге тиіс.
Сонымен қатар 1 желтоқсандағы жағдай бойынша өңірлерде 6,7 мың жоба бойынша жұмыс басталды, 220 мыңнан аса жұмыс орны құрылды, оның ішінде халықты жұмыспен қамту орталықтары арқылы 116 мыңнан аса жұмыс орны ашылды. Бағдарламаға қатысушылардың жартысы ауыл тұрғындары, 39%-ы – жастар және 7%-ы – табысы аз азаматтар. ЖҚЖК шеңберінде жұмыспен қамтылғандардың ең жоғары үлесі – Шығыс Қазақстан (20,6 мың адам немесе 109,2%), Жамбыл (19,7 мың адам немесе 100%), Атырау (7,6 мың адам немесе 106%) облыстарында.
Бұған дейін хабарланғандай, ЖҚЖК аясында барлығы 255 мың жұмыс орнын ашу жоспарлануда. Бұл ретте бағдарлама болашақта 100 мыңнан аса тұрақты жұмыс орнын ашуға негіз болады.
Төтенше жағдай кезінде де төлем тоқтамады
Табысын жоғалтқан жағдайда Мемлекеттік әлеуметтік сақтандыру қорынан көлемі ең төменгі жалақы – 42 500 теңгеге тең біржолғы төлем көмегімен қазақстандықтарға әлеуметтік қолдау көрсетілді. Төтенше жағдай режімі мен карантиндік шектеу шаралары кезінде күнделікті нәпақасынан айырылған азаматтар мемлекеттік қолдаудың аталған түріне ие болды. Олардың ішінде жалақысы сақталмайтын демалыста жүрген қызметкерлер, жеке кәсіпкерлер, жеке практикамен айналысатын адамдар, нысаналы жұмыстарды орындау (қызмет көрсету) сияқты азаматтық-құқықтық сипаттағы шарттар бойынша табыс табатын жеке тұлғалар, бірыңғай жиынтық төлемді төлеушілер бар.
Жағдай ушығып, төтенше жағдай режімі созылған 11 мамырға дейін 322 млрд теңге сомасында 4,6 млн адамға, ал карантиндік шектеу шаралары қолданылған кезде 153,2 млрд теңге сомасында 2,4 млн адамға әлеуметтік төлем тағайындалды.
Карантиндік шектеу шараларының қолданылу кезеңіне МӘСҚ-тан әлеуметтік төлем тағайындауға өтініш биыл 1 қыркүйекке дейін қабылданды. Жалпы жыл басынан бері жұмысынан айырылған жағдайда Мемлекеттік әлеуметтік сақтандыру қорынан әлеуметтік төлем алушылардың саны 92,4 мың адамды құрады. Бұл ретте 10 747 азаматқа төлем қараша айында тағайындалды.
Қолданыстағы заңнамаға сәйкес жұмыстан босатылған қызметкерлер міндетті әлеуметтік сақтандыру жүйесіне қатысу өтіліне және кейінгі 24 айдағы табысына байланысты 1 айдан 6 айға дейін жұмысынан айырылуы бойынша әлеуметтік төлемдер алады. Төлем жоғалған кірістің 40%-ына дейінгі мөлшерде МӘСҚ қаражаты есебінен жүзеге асырылады. Төлем тағайындау үшін жұмыстан босатылған қызметкерге еgov.kz порталында авторизациялану, «Жұмысқа орналастыру және жұмыспен қамту» бөлімінде «Жұмыс іздеуші адамдарды тіркеу» қызметін таңдау, онлайн-қызметке тапсырыс беріп, барлық жолды толтыру және оған ЭЦҚ-мен қол қойып, өтінімді жіберу қажет. Бір күн ішінде тұрғылықты жеріңіздегі халықты жұмыспен қамту орталығы бос жұмыс орындарын ұсынады, егер жұмыс табылмаса, 3 жұмыс күні ішінде қашықтан жұмыссыз мәртебесі беріледі.
Жұмыссыз ретінде тіркелу туралы мәліметтер болған кезде Еңбек және халықты әлеуметтік қорғау министрлігінің ақпараттық жүйесі проактивті форматта МӘСҚ-тан төлемді тағайындау бойынша қызмет көрсетуге келісу үшін мобильді телефонға SMS-хабарлама жібереді. Келіскен жағдайда SMS-хабарламаға жауап беру қажет. Төлем автоматты түрде тағайындалады.
Естеріңізге сала кетейік, МӘСҚ қаражаты есебінен жұмысынан айырылған жағдайда төленетін әлеуметтік төлем жұмыстан шығу себептеріне қарамастан жүзеге асырылды және жұмыссыз адам жұмыс іздеген кезеңде оны қолдауға арналған.
Бұдан бұрын айтылғандай, Еңбек және халықты әлеуметтік қорғау министрлігі осы жылдың 17 қарашасынан бастап республикалық маңызы бар қалалар мен облыс орталықтарының тұрғындары үшін тестілік режімде Электронды еңбек биржасы арқылы халықты жұмыспен қамту орталықтарының қашықтықтан қызмет көрсету функционалын іске қосты. Қанатқақты жоба жұмыссыздарды тіркеу рәсімдерін жеңілдету және жұмыспен қамтуды қолдау бойынша мемлекеттік қызметтерді, оның ішінде жұмысынан айрылу бойынша әлеуметтік төлемдерді алуды жеңілдету үшін іске қосылды. Енді барлығын тек интернет, компьютер және электронды цифрлы қолтаңба арқылы ғана іске асыруға болады.
