Қоғам • 08 Қаңтар, 2021

Құм төндірген қауіп

314 рет көрсетілді

Қазақтың алтын бесігі – ауыл. Үштаған аталатын аядай ауылда кіндік қаны тамған 145 отбасы әлі де өкше көтергісі келмейді. Алайда осынша отбасы мүшелерінің ыстық мекеніне айналған ауылға бір қауіп төніп тұр. Бұл – табиғаттың тосын мінезімен үйіріле соққан құмның қаупі.

Қазір Үштағандағы шашырай орналасқан үйлердің айналасын ұзындығы 5, ені 2 шақырымға созылған құм қоршап жатыр. Тіпті дөңге айналған құмның биіктігі тұрғын үймен теңескен. Мә­селен, ауыл шетіндегі Ере­же­повтер отбасы күнделікті тір­лігін құм күреумен бастайды. Отанасы Ақтолқынның айтуынша, қысы-жазы тоқ­таусыз жылжыған құм көшкіні тұрғын үйлерді басып қалуы мүмкін.

Құмнан төнген қауіп тек Ережеповтер отбасын ғана алаң­датып отырған мәселе емес. Бұл – Үштағанды мекен еткен 145 отбасыға ортақ қауіп. Десек те олардың ешқайсысы бұл ауылдан көшкісі жоқ. Мұның себебін олар құмды өңірдің мал ұстауға қолайлығымен байланыстырады.

– Төрт түлік өсірген қазақ­пыз ғой. Үштағанның жа­йы­лымдық жері шүйгін. Жер ас­тынан шығып жатқан тұщы суы бар. Көгілдір отынға қол жеткіздік. Аудан орталығынан шалғай болғанымен, жанға да, малға да жайлы жерді тас­тап кетуге қимаймыз. Бір баламыз қырда мал ұстап отыр. Күнкөрісімізге жететін табыс табуға болады. Тек бізді қинайтыны – құмның қаупі мен жол қатынасының нашарлығы. Осы мәселелер шешімін тапса, кіндік кескен мекеннен артығы жоқ, – дейді көп балалы ана Балғаным Қапанқызы.

Құмнан төнген қауіп тек Үштаған ауылының тұр­ғын­дарын ғана алаңдатып отыр­ған жоқ. Облыстық табиғи ресурс­тарды басқару және таби­ғатты пайдалануды реттеу басқармасының басшысы Қадыржан Арыстанның ай­туын­ша, мұндай қауіп осы кезге дейін Жылыой ауданындағы Майкөмген, Исатай ауданының Забурын, Исатай, сондай-ақ Қызылқоға ауданына қарасты Миялы, Жасқайрат ауылдарына да төнген екен. Сол себептен бұл ауылдардың айналасына құм көшкініне қарсы жас көшеттер егіліпті. Енді осындай әдіс Үштаған ауылының маңына да қолданылғалы отыр. Өйткені соңғы он жылға жуық мерзімнен бері бұл ауылды құм қаупінен құтқару үшін мұндай жұмыс атқарылмаған екен.

– Аталған ауылдың аумағы зерделеніп, 33,8 гектар жерге құм көшкінін тоқтату жұ­мысын жүргізу мәселесі аудан әкімдігімен келісілді. Биыл 10 гек­тар аумаққа орналастыру жо­басы қолға алынады. Осыған орай жеке кәсіпкер 1 млн 200 мың теңге алып, ауыл іргесіне сексеуіл егуді бастайды. Бұл жұмыс кезең-кезеңімен жүзеге асады, – дейді Қадыржан Арыстан.

 

Атырау облысы

 

Соңғы жаңалықтар

Ұқсас жаңалықтар