Қариялар да қалыс қалмады

Қанзия Сақауова 104 жаста. Жастайынан колхоз, совхоздың жұмысына араласып, елге қызмет етіп келген қария, елге пайдасы тигенін қалайды. Ал бірер күн бұрын 100 жасқа шыққан Ақілгек Құлбарақова «менің таңдауым – бейбітшілік», дейді.

Қос ғасырдың куәсі болған кейуаналардан дауыс үйлеріне барып алынды.

 * * *

Парламент Мәжілісі пен мәслихат депутат­тарының сайлауына Жетісу жұрты да белсенді дауыс беруде. Жалпы, Алматы облысы бойынша 1 400 038 тұрғын дауыс беруге құқылы болса, олардың 30 пайыздан астамы түске дейін дауыс берген. Сайлау күні 109 жастағы Алтынхан әже де өз таңдауын жасады.

Жетісудағы қарт сайлаушы Сарқан ауданында тұрады екен. Қарияның үйден дауыс беруіне жағдай жасап, көшпелі жәшік әкелген сайлау комиссиясының өкілдеріне батасын берген өңірдің қарт тұрғыны Алтынхан Белдеубай:

– Осындай бейбіт күнді халқымыз көп аңсады. Енді осы тәуелсіздікті бағалауымыз керек. Менің жасым жүзден асып кетсе де, ешқашан сайлаудан тыс қалған емеспін, сайлауға әр азаматтың баруы міндетті. Сайлауда еліміздің болашағы шешілетін күн, оған бейжай қарамаған жөн. Еліміз аман жұртымыз тыныш, әр отбасына береке-бірлік тілеймін, – деді.

 * * *

Қызылорда облысы Сырдария ауданында тұратын 99 жастағы соғыс ардагері Яхия Та­сыров сайлау учаскесіне өзі барып, таң­дауын жасады. Маңызды науқанда қарт жа­уын­гер аудан орталығындағы №155 сайлау учас­кесінде алғашқы болып дауыс берді. Арда­гер бұған дейінгі сайлау науқандарында да өз белсенділігімен көзге түсіп жүрген болатын.

«Сайлау – мемлекеттің әрбір азаматының өз болашағы үшін таңдау білдіру құқығы. Мен бар­лық сайлауда осындай белсенділік танытып келемін. Алғашқылардың бірі ретінде таңдау жасаймын. Бүгін де сол әдетімнен жаңылған жоқпын», деді Яхия Тасыров.

Майдангер қария саяси науқанның сәтті өтуіне ақ батасын  берді. «Сырдария ауданының Құрметті азаматы» Яхия Тасыров 1922 жылы Сырдария ауданы А.Тоқмағанбетов ауылында дү­ниеге келген. Сталинград, Беларусь, Курск қалаларын, Польшаны азат етуге қатысқан. Май­дангер 120 жауынгерден құралған автоматшылар ротасында болған.

Сұрапыл соғыс кезінде оң аяғына оқ тиген. Елге келгеннен кейін орта мектепте әскери даярлық пәнінен сабақ берді. Одан кейінгі жылдарда еңбегі Тереңөзек, Жалағаш аудандық май зауыттарында жалғасты. Беріде отын дайындау мекемесінде жұмыс істеп, 1981 жылы зейнеткерлікке шыққан.

 Дайындағандар

Қалмаханбет МҰҚАМЕТҚАЛИ,

Динар КЕРІМ,

«Egemen Qazaqstan»