Саясат • 12 Қаңтар, 2021

Өрескел заң бұзушылық болған жоқ

244 рет
көрсетілді
4 мин
оқу үшін

Сайлауды бейпартиялық байқау орталығының басшысы, Қазақстанның Азаматтық альянсының президенті Бану Нұрғазиева мен Кәсіподақтар федерациясы төрағасының орынбасары, Қазақстан кәсіподақтары федерациясы байқаушылары республикалық штабының төрағасы Нұрлан Өтешев
Парламент Мәжілісі мен жергілікті мәслихат депутаттарын сайлау кезіндегі жұмыстардың қорытындысы туралы баяндады.

Өрескел заң бұзушылық болған жоқ

Сайлауды бейпартиялық байқау орта­лығы тұңғыш рет қоғамдық инс­титут болып құрылып, 10 қаңтарда сайлау барысын бақылайтын ахуалдық орта­лық ретінде қызмет еткен болатын. Осы орталықтың платформасында Қа­зақ­станның Азаматтық альянсы, Қазақ­стан Кәсіподақтары федерациясы жә­не орталықтың серіктестері санала­тын 130-дан астам үкіметтік емес ұйым­дар өз ресурстарын біріктіріп, жұмыс істеді. Б.Нұрғазиеваның айтуын­ша, байқаушылар бұл сайлауда өз­дерінің кәсіби шеберліктері мен жауап­кер­шіліктерін, құзыреттерін таныта алыпты.

– Ең бастысы, байқаушыларымыз сайлау заңнамасын жақсы біледі. Олар сай­лау учаскелеріне алдын ала келіп, өз орындарынан табылды. Тіпті әлеуметтік желілерде байқаушыларымыз сайлау учаскелеріне таңғы сағат 6.00-де келгендері туралы айтылып жатыр. Құ­жат­тарын ұсынып, еш қиындықсыз тіркеу­ден өтті. Сондай-ақ Парламент Мәжі­лісі мен жергілікті мәслихат депутаттарын сайлау кезінде эпидемиялық жағ­дайға қарамастан, сайлаушылардың да көп­теп келгенін алға тарта аламыз. Бұл Қазақстандағы қоғамның демо­кратиялық сана-сезімінің жоғары дең­гейін аңғартады. Отандастарымыз мем­ле­кеттің болашағы кез келген сайлаумен, соның ішінде Парламент Мәжілісі мен жергілікті мәслихат депутаттарын сайлаумен тығыз байланысты екенін жақсы түсінеді, – дейді Б.Нұрғазиева.

Орталық басшысының айтуынша, сай­лаушылар да, учаскелік сайлау ко­мис­сияларының мүшелері де, байқаушылар да еліміздегі осынау маңызды науқан кезінде жауапкершілікті сезіне біліпті. Соның нәтижесі ретінде, осы орталықтың байқау қорытындысы сайлау барысында қандай да бір ірі заң бұзушылық фактілері орын алмағанын айғақтап отыр. Сайлау процесі кезінде ашықтық пен әділдік басты мақсатқа айналды.

– Әрине, кейбір бұзушылықтардың болғанын жасырмаймыз. Әлемнің қай мемлекетінде болсын сайлау кезінде ұсақ-түйек бұзушылықтар болып жатады. Ондай бұзушылықтардың көбісі техникалық сипатқа ие. Жалпы алғанда, бей­партиялық байқау орталығы 11 бұзу­шылықты тіркеді. Мұндай олқылықтар Петропавл, Тараз, Ақтөбе, Орал, Ал­маты, Қостанай, Шымкент, Жаңаөзен қалаларында, Шығыс Қазақстан облысында орын алды. Алайда өрескел заңбұзушылықтар болған жоқ. Сайлау процесінің заңдылығы мен ашықтығына кедергі келмеді, – дейді Б.Нұрғазиева.

Барлық штаб жедел әрі жылдам жұмыс істеп, соның нәтижесінде байқау қызметі қиынға соқпаған сыңайлы. Жүйелі жұмыс пен байқаушылардың байыптылығының арқасында сайлау процесі қалыпты жағдайда өтті.

– Барлық мәлімет бізге жедел жетіп тұрды. Әсіресе Алматы қаласындағы штаб­тың жұмысын айрықша атап өткім келеді. Олар ұйымдастырған жедел желінің нәтижесінде 200-ден астам өті­нім қаралды. Бұл да азаматтық қоғамның мықты әрі жауапты бола бастаған­ды­ғының бір көрінісі, – дейді Б.Нұрғазиева.

Сайлау кезінде әлеуметтік желілерде жүздеген жалған ақпарат тарады. Мәселен, біздің елімізде болмаған, өзге мемлекеттерде орын алған жағымсыз оқиғалардың бейнежазбалары тарады. Құдды сайлау күні болғандай етіп ұсынылып жатты басым көпшілігі.

– Бұл мәселелер де біздің назарымыздан тыс қалған жоқ. Ондай фейк ақпараттарды адамдар қасақана тарата ма, жоқ әлде білместіктен сондай қадамға бара ма деген мәселені күні бүгінге дейін талқылап жатырмыз. Ондай азаматтардың көпшілігі өзінің құқығы мен міндеттерін білмегендіктен, оғаш әрекетке барғандары да белгілі болып жатыр. Мұндай бейнежазбалардың тарап жатқанын байқаушыларға да ескерттік, – дейді Н.Өтешев.

Оның айтуынша, сайлау заң шең­берінде өтіп отыр. Сайлау кезінде отандас­тарымыз құқықтық мәдениеті жоғары екенін танытты. Сайлау комиссиясы да, байқаушылар да, сайлаушылар да өз жұ­мыстарына аса жауапкершілікпен қарады.

– Бұл ретте, Қазақстан кәсіподақтары федерациясының тарапынан сайлау барысына атсалысқан байқаушыларымызға алғыс айтқым келеді. Расымен де, ауқым­ды жұмыс атқарылды. Еселі еңбек етіп, сайлау процесіне үлкен үлес қосқан аза­маттарға алғысым шексіз, – дейді Н.Өте­шев.