– Р.Дригоның «Талисман» балетінен па-де-де әлем бойынша балетсүйер қауым арасында үлкен атаққа ие болды. Ол барлық халықаралық балет байқауларының бағдарламасына және көптеген әлемдік балет труппаларының репертуарына енген. Осынау нөмірдің тамаша сюжеті бойынша алдымызда ежелгі Үндістанның тылсым әлемі ашылады. Менің орындауымдағы жел құдайы Вайю аспан рухтары әміршісінің қызы Ниритимен бірге билейді. М.Петипа мен П.Гусевтің хореографиясы айрықша шеберлігімен әрі мәнерлігімен өзгешеленеді. Біздің орындауымыздағы осы классикалық жауһардың интерпретациясы елордалық көрерменнің көңілінен шығады деген үміттемін, – деп ой бөлісті Серік Нақыспеков.
Ал театрдың талантты солисі Далер Запаров болса бұл күні Э.Дельдевез, Л.Минкустың «Пахита» балетінен гран-памен дебют жасайды. Сонымен бірге жас балет әртістері София Әділханова, Нұрай Нұрсафина, Евгений Рыбкин, Диас Құрманғазы, Рустам Чахалов осы нөмірде алғаш рет сахна төріне шығады. Далер Запаровпен жұптасып театрдың жетекші солисі, Қазақстанның еңбек сіңірген қайраткері Әнел Рүстемова өнер көрсетеді. Сәнді де мерекелік гран-па балет кейіпкерлерінің салтанатты үйлену тойын би тілінде баян етеді. Ол бөлшектердің молдығы, нақыш, испандық темперамент және вариациялардың сан алуандығымен өзгешеленеді.
– Менің пікірімше, мейлі алғашқы, премьералық орындау немесе репертуарлық спектакль болсын, әрқашан барлық өнер көрсетулер өзінше ерекше. Қай партия болсын, сахнаға шыққан сайын әртіс ретінде орындалатын бейненің жаңа қырларын, тың дүниелер ашамын. Десе де аталған Гала-балетте сахнаға шығу мен үшін өте маңызды, сондықтан эмоционалдық жағынан күш-қуатым артып, жаңа жылды сүйікті сахнамда жақсылықпен бастауға құштарлығым зор, – деп өз әсерін жеткізді Далер Запаров.
Екі бөлімнен тұратын алуан түрлі бағдарламаға театр репертуарындағы классикалық, неоклассикалық және заманауи қойылымдардан үзінділер енді. Атап айтсақ, Ж.Коралли мен Ж.Перроның хореографиясындағы А.Аданның «Жизель» балетінен па-де-де, Л.Минкустың «Баядерка» балетінен үнді биі, М.Петипаның хореографиясындағы П.Чайковскийдің «Аққу көлі» балетінен па-де-де және т.б. Сондай-ақ бұл кеште Патрик де Бананың хореографиясындағы «Дала үні» балетінен дуэт орындалатын болады. Еске салар болсақ, осынау ұлттық балеттің әлемдік премьерасы Мәдениет және спорт министрлігінің қолдауымен желтоқсан айында елордалық көрерменге зор жетістікпен ұсынылған еді.
Классикалық би өнері елорда тұрғындары мен қонақтарына «Астана Опера» театрының жетекші солистері, Қазақстанның еңбек сіңірген қайраткерлері Әйгерім Бекетаева мен Еркін Рахматуллаев, Олжас Тарланов, балет труппасының солисі Анастасия Заклинская, балет әртістері Марико Китамура, Мөлдір Шәкімова, Аделина Төлепова, Жәнібек Ахмедиев, Жансерік Ахметов, Бостан Қожабековтің орындауында ұсынылатын болады. «Астана Опера» симфониялық оркестрі дирижер Арман Оразғалиевтің жетекшілігімен өнер көрсетеді.
