Соңғы жылдары жүйелі жүзеге асып жатқан оңтайлы бағдарламалар жұмысшы жастар үшін үміт шамын жаққаны рас. Тірнектеп тапқаныңды жалдамалы пәтер иесінің қалтасына құйғаннан көрі пайыздық мөлшерлемесі төмен, біраз жылдан кейін иелігіңде қалатын өз үйіңде өмір сүрген көңілге де жұбаныш. Алматы қаласында әлеуметтік салада жұмыс істейтін кез келген жас үшін мұндай мүмкіндіктің қақпасын ашып берген «Алматы жастары 3:0» бағдарламасы іске қосылған бір жыл ішінде мыңға тарта отбасы қоныс тойын тойлады. Б.Сағынтаев бағдарлама арнасын одан ары кеңітіп, 2021 жылы тағы да мыңдаған отбасы баспана алу бақытына кенелетінін алға тартты. Әкімнің сөзінше, осы бағытта әкімдік пен «Отбасы банк» АҚ арасында талқылау жүріп жатыр.
«Былтыр банкпен біріге отырып 13 млрд теңге бөлдік. Бүгінде қала экономикасының әр саласында еңбек етіп жатқан 1 мыңға жуық жас осы бағдарламамен пәтер алды. Биыл да осыны жалғастырамыз. Инфляцияға байланысты нарықта пәтер қымбаттап барады. Соған орай несие көлемін 18 млрд теңгеге жеткізіп отырмыз. Биыл да 1 мың пәтер беріледі. Бұл «Нұрлы жер», «Бақытты отбасы» бағдарламаларынан тыс жүзеге аспақ», деді қала басшысы.
Еске салсақ, «Алматы жастары 3:0» бағдарламасы 35 жасқа дейінгі әлеуметтік сала қызметкерлерін қолдауға бағытталған. Олардың сапында – мұғалімдер, дәрігерлер, ЖОО оқытушылары, мәдениет, спорт саласының өкілдері, журналистер мен ғалымдар бар.
Тұтас ел көлеміндегі студенттердің тең жартысын қамтитын шаһарда жатақхана жайы да түйіткілді мәселенің бірі. Әкім бұған дейін 25 жоғары оқу орнының аумағында 16 мың орынға арналған 38 жатақхана, сонымен бірге екі колледжде 600 адамға шақталған студенттер үйі салынатынын тілге тиек еткен. Аталған жоспар ойдағыдай жүзеге асар болса, он мыңдаған шәкірт баспана жалдап бас қатырмас еді.
Биыл болашағы үшін қор жинасам дейтін жастар үшін де ақжолтай жаңалықтың шеті шықты. Бұған дейін қалада кең өріс алған жалға алу бағдарламасымен 5 мыңға тарта жұмыскер жас баспаналы болуы бек мүмкін. 8,4 мың көп пәтерлі тұрғын үйі бар Алматы елдегі тұрғын үй қоры ең бай қала екенін атап өткен жөн. Десе де күн санап аумағы ұлғайған мегаполисте баспана кезегі қарқындап өсіп келеді. Бүгінгі таңда 20 мыңнан астам адам тұрғын үй кезегінде тұр.
АЛМАТЫ
