Парламент • 19 Қаңтар, 2021

Сенаторлар Қазақстан мен Грузия арасындағы транзиттік жүк тасымалдау мәселесін зерделеді

7 рет көрсетілді

Сенаттың Экономикалық саясат, инновациялық даму және кәсіпкерлік комитетінің кеңейтілген отырысында Қазақстан мен Грузия арасындағы жүк тасымалына рұқсат беру жүйесін енгізу басты тақырып болды, деп хабарлайды Egemen.kz ҚР Парламенті Сенатының баспасөз қызметіне сілтеме жасап.

Оған еліміздің ұлттық мүдделерін сақтау, сондай-ақ Қазақстан мен Грузин бағытында жұмыс істейтін отандық тасымалдаушылар мен осы екі ел арқылы транзиттік жүк тасымалын жүзеге асырушылардың жағдайын жақсарту қажеттігі себеп болып отыр. 

Қазіргі кезде тасымалдау рұқсат етілмесе де жүзеге асып жатқанын атап өткен жөн. Ол Грузия тарапына, Грузияда тіркелген шетелдік компанияларға нарықтың осы бағытында үстемдік етуіне мүмкіндік беріп отыр. Мысалы, 2019 жылы олар жалпы нарықтың 69%-на ие болды.

Рұқсат беру жұмыстарының қағидасы өзгергеннен кейін халықаралық тасымалдауда тепе-теңдік орнату мүмкіндігі туындайды, қазақстандық тасымалдаушылардың үлесін ұлғайтуға, сондай-ақ олардың бәсекеге қабілеттілігін арттыруға жол ашылады. 

 «2007 жылғы 6 наурыздағы Қазақстан Республикасының Үкіметі мен Грузия Үкіметі арасындағы Халықаралық автомобиль қатынасы туралы келісімге өзгерістер мен толықтырулар енгізу туралы хаттаманы ратификациялау туралы» заң жобасында бір рейске баруға құқық беретін жүктерді тасымалдаудың әрқайсысына жеке рұқсат беру қажет екендігі көрсетілген. Сондай-ақ жобада тараптар жыл сайын бір-біріне тауарларды тасымалдауға арналған келісімнің құжаттарын жіберетіні айтылған. Онда арнайы бланкілерге мөр басылып, рұқсат берген құзыретті органның қолы қойылуы керек. 

Экономикалық саясат, инновациялық даму және кәсіпкерлік комитеті заң жобасын Палатаның қарауына енгізді.

Соңғы жаңалықтар

Ұқсас жаңалықтар