Жастарға үміт сыйлады

Пікір • 20 Қаңтар, 2021

Жастарға үміт сыйлады

5 рет көрсетілді

Қазақстан Республикасының Президенті Қасым-Жомарт Тоқаев VII шақырылымдағы Парламенттің бірінші сессиясына қатысты. Отырыста еліміздің әлеуметтік-экономикалық даму барысын қорытындылап, осы күнге дейінгі атқарылған іс-әрекетке баға берді.

Egemen Qazaqstan

Мемлекет басшысы жаңа құрамдағы Мәжілістің алдында тұрған нақты міндеттерді айқындап өтті. Сонымен қатар биыл іске асатын реформалар жайы да сөз болды. Оның ішінде қазіргі таңдағы мемлекеттік басқару жүйесінің стратегиялық жоспарлау бағыты бар, соның негізінде әртүрлі заңнамалық, әлеуметтік кодекс, жастар мәселесі, басқа да маңызды бағыттар жарияланды.

Қасым-Жомарт Тоқаев жергілікті органдардың жұмысы жастар саясатын жүзеге асыруға қатысты бағаланатыны туралы атап өтті. Келешекте елдің экономикасы жастардың қолында болады. Бұл мемлекеттің дамуына, сонымен қатар маңызды деген салалардың сапасына әсер етеді. Сондықтан да менің ойымша осындай маңызды бағыттарды Парламент тиісті деңгейде жүзеге асырса, мемлекеттің дамуына, жалпы Үкімет жұмысының тиімді жүзеге асырылуына сеп болар еді. Үкімет пен Мәжілістің жаңа құрамы қазіргі пандемия салдарынан құлдыраған экономиканың ұзақ мерзімді өсімін қамтамасыз етуге және халықтың әл-ауқатын жақсартуға баса көңіл бөледі деп сенемін.

Мемлекет басшысы Парламенттің, әсіресе депутаттардың рөлі мен олардың жұмыс бағыты туралы нақты айтты. Өйткені қазіргі таңда Парламенттің мақсаты –қоғамды толғандыратын мәселелерді Үкіметке жеткізу, заңның сапасы, олардың жүзеге асырылуын қадағалау. Президенттің жастар мәселесі бойынша жастардың даму индексін енгізу, жастарға барлық жағдайдың жасалуы жайындағы ұсынысы қуантты.

Жаңа сайланған Қазақстан Республикасы Парламенті Мәжілісіне алғашқы отырыста жаңаша жобалар мен тиімді бастамалардан тұратын биік мақсаттар мен нақты міндеттер қойылды деуге болады. Біз сияқты жастарға жаңа бағыт, жаңа тыныстың ашылуы, мемлекетке өзгеше көзқарастағы тұлғалардың келуі үлкен үміт сыйлайды. Жастарға көңіл бөлу, ең алдымен олардың жаңа идеяларын қолдап, жұмыссыздықтың алдын алудан басталады.

Аян САКОШЕВ,

«Жастар» ғылыми-зерттеу орталығының директоры

Күннің маңызды және өзекті жаңалықтарын «Егемен Қазақстан» телеграм каналынан оқыңыз