Әсіресе Атырау қаласы мен Жылыой ауданындағы «Теңіз» кенішінде індетті жұқтырушылар қатары күн сайын көбейіп жатыр. Қазір облыс орталығында – 6 369, Жылыой ауданында 6 708 науқас тіркелген. Ал «Теңіз» кен орнындағы мердігер меке­ме­лердің 5 467 жұмысшысы, Жылы­ой ауданының орталығы Құл­са­ры қаласында 1 241 науқас бар. Сондай-ақ Индер ауданында – 406, Исатайда – 262, Қызылқоғада – 487, Құрманғазыда – 385, Мақатта – 310, Махамбет ауданында 259 адамның қауіпті індеттің «құрығына» ілінге­ні белгілі болып отыр.

Осы деректің өзінен коронавирус инфекциясының мұнайлы өңір­дегі ауданның бәрінде тарал­ға­нын байқауға болады. Мәселен, 20 қаңтардағы мәліметке қарағанда, тағы 82 адамнан коронавирус анық­талды. Науқастардың арасын­да Атырау қаласынан 16 адам бар. «Теңіз» кенішінде – 58 жұмысшы, Құлсары қаласынан – 3 , Индер ауданынан – 1, Қызылқоғадан – 1, Құрманғазы ауданынан 3 адам коронавирусқа шалдыққан. Оның ішінде 11 адам денсаулық жағдайына байланысты медицина­лық көмекке жүгінсе, 63 науқастан COVID-19 скринигтен өту кезінде табылыпты. Сондай-ақ 8 адам қа­уіп­ті вирус жұқтырған науқаспен қарым-қатынаста болған екен.

 Дегенмен облыс әкімі Махамбет Досмұхамбетов эпидемиялық жағдайды тұрақты деп есептейді. Әкімнің айтуынша, өткен аптада коронавирус инфекциясының 564 жағдайы тіркелді. Оның ішінде 379 жағдай, яғни 67 пайызы «Теңіз» кен орнындағы вахталық қала­шық­тарда анықталды. Облыста тір­кел­ген індеттің 81 пайызы, со­нымен қатар «Теңіз» кен орнында анықталған жағдайдың 89 пайызы симптомсыз саналады. Репродуктивтік индексі 1,01 па­йызды құрайды. Қазір облыстың бас санитар дәрігерінің қаулысымен «Теңіз» кен орнындағы карантин мерзімі ұзартылып, шектеу шаралары күшейтілді.

– Өңірде 1 933 инфекциялық төсектік орын әзірленді. Ауруха­на­лар­да 4 МРТ, 12 компьютерлік томография, 27 рентген, 267 өкпені жасанды желдету аппараттары, 669 оттегі концентраты, 1 514 пульсоксиметр, 6 оттегі стансасы, 113 жедел ме­дициналық жәрдем көлігі, 7 жыл­жымалы медициналық кешен бар. Коронавирус пневмониясы мен ЖРВИ-мен сырқаттанған науқас­тар­ға амбулаторлық деңгейдегі медициналық көмекті 126 мобильді топ көрсетіп отыр. Барлық медици­на­лық мекемеде жеке қорғаныш құралдарының 2 айлық қоры бар. Сондай-ақ тәулігіне 7 мыңға жуық зерттеу жүргізетін 11 ПТР зертха­насы жұмыс істеп тұр. Індет бас­тал­ғаннан бері облыста 575 мың зерттеу жүргізілді. Соңғы аптада орташа тәуліктік көрсеткіш 3 975 тестіні құрады. Биылғы қаңтарда жүр­гі­зілген ПТР зерттеулердің саны өткен жылдың желтоқсандағы көрсеткішпен салыстырғанда 23 пайызға артып отыр, – дейді М.Досмұхамбетов.

«Қызыл аймақтағы» Атырауда коронавирус инфекциясы неге өрши береді? Әрине бұл сауал жергілікті атқаушы билікті ғана емес, тұр­ғын­дарды да мазалайтыны даусыз. Дәрігерлердің айтуынша, бұған жасырын өткізілетін отбасылық шаралардың әсері тиіп отыр. Осы орайда Үкімет жанындағы коро­на­вирустың таралуына жол бермеу жөніндегі ведомствоаралық комиссияның мәліметіне сүйенсек, биылғы 1-10 қаңтарда мобильдік топтар 903 рейд жүргізіп, 3 769 ны­­сан­­ды тексерді. Рейд кезінде сани­­тариялық-эпи­де­миялық, карантиндік шектеу та­лап­тарын бұзудың 28 де­ре­гі анық­тал­ды. Мәселен, Қызылқоға ауданында отбасылық іс-шара­ларды өткізуге тыйым салын­ға­ны­на қарамастан, осы күндері екі үйлену тойы өткізіліпті. Ал Аты­рау қаласында бас мемлекеттік сани­тар­лық дәрігердің қаулысына сәйкес қызметіне тыйым салын­ған «Регионбет» лото клубы келуші­лер­ді жасырын қабылдағаны белгі­лі болды.

Сондай-ақ Жылыой ауданын­да­ғы «Теңіз» вахталық қалашы­ғында бетперде режімін сақтамаудың 2, бекітілген жұмыс режімін бұзу­дың 1 дерегі анықталды. Осын­дай дерекке қатысты 22 мате­ри­ал әлі қаралып жатыр. Мо­биль­­ді топтар мен жергілікті полиция департаментінен түскен материал­дар­ға қатысты «Әкім­шілік құқық бұзушылық туралы» кодексіндегі 425-бабының 1-бөлігіне сәйкес жалпы сомасы 547 975 теңгенің 6 айыппұлы салынды.

Қазір Ресей Федерациясымен шекарадағы Құрманғазы ауданында санитарлық-карантиндік бекет жұмыс істейді. Мұнда тәулік бойы адамдардың ел аумағына кіруіне мониторинг жүргізіледі. Сондай-ақ шекарадан анықтамасы жоқ Қазақстан азаматтары ПТР-тесттен өтеді. Карантиндік шектеу шаралары енгізілгеннен бері Атырау облысына 18 526 адам келген. Шекарадан өтушілерге 2 128 ПТР зерттеу жүргізілді. Соның нәти­жесінде Сovid-19 инфек­ция­сының 9 жағдайы анықталды. ПТР-тест өткізу үшін карантиндік стацио­нар­ларға еліміздің 273 азаматы орналастырылды. Ел аума­ғына 246 шетелдік азамат жібе­ріл­ген жоқ.

Аталған бекеттен соңғы бір тәулікте Қазақстанның 82 азаматы өткен. Оның ішінде 17 жаяу жүргінші, жүк көліктерінің 65 жүргізушісі бар. ПТР-тест жасалған 11 адамда зерттеу қорытындысы теріс нәтиже көрсетіпті. Алайда Ресей Федерациясының бір азаматында ПТР-тест нәтижесі туралы анықтамасы болмаған. Сол себептен оған шекарадан өтуге тыйым салынды.

Атырау облысы