«Ер Едіге-Ноғайлы дәуірінің жыры» музыкалық альбомы жарық көрді

Руханият • 22 Қаңтар, 2021

«Ер Едіге-Ноғайлы дәуірінің жыры» атты музыкалық альбом жарық көрді

223 рет көрсетілді

Нұр-Сұлтан қаласында Ұлттық академиялық кітапханада «Ер Едіге-Ноғайлы дәуірінің жыры» музыкалық альбомы таныстырылды, деп хабарлайды Egemen.kz

Айым ДӘУІТ

Бірнеше жыр-дастанды қамтыған жаңа жинақ Ақтөбе облысының әкімдігінің мұрындық болуымен жарыққа шығып отыр.

«Соңғы екі жылда Ақтөбе облысы әкімдігінің қолдауымен, облыстық мәдениет, архивтер және құжаттама басқармасы Ноғайлы дәуірі жырларының антологиясын шығаруды қолға алған болатын. Сол жұмыстың нәтижесінде, 2020 жылы ҚР еңбек сіңірген қайраткері, белгілі жыршы-жырау Алмас Алматовтың жетекшілігімен «Ер Едіге» — Ноғайлы дәуірінің жыры» атты музыкалық альбом жарыққа шықты», деп атап өтті Ақтөбе облысы әкімінің орынбасары М.Шермағанбет Нұр-Сұлтанда «Ер Едіге –Ноғайлы дәуірінің жыры» атты ғылыми-практикалық конференцияда.

«Ер Едіге» — түркі халықтары арасында ең көп тараған жырлардың бірі. Жинаққа енген жырларда көптеген тарихи тұлғалардың есімдері аталып, ерлік істері баяндалған. Жинаққа «Едіге батыр» эпосы, Мұрын жырау нұсқасындағы «Қырымның қырық батыры» және «Қарасай-Қази» дастаны (Қайролла Иманғалиев нұсқасы), және басқа да ел арасында кеңінен жырланып жүрген көлемді дастандар енген. Жалпы саны 40-тан астам жыршыдан 60 сағаттық жыр жазып алынған.

«Елбасымыздың «Рухани жаңғыру» бағдарламасы аясында жарық көріп отырған «Ер Едіге» — Ноғайлы дәуірінің жыры» музыкалық альбомының жарық көруі – ұлттық музыка тарихындағы елеулі оқиға десек, қателеспейміз. Едіге батырдың өмірі мен ерлік жолдары қазаққа ғана емес, исі түркі халықтарына ортақ мұра. Осы ретте атақты эпик жырау Мұрын Сеңгірбайұлының орындауындағы «Қырымның қырық батыры», ақын Нұрпейіс Байғаниннің жырларының осы жинаққа енуі жобаның құнын арта түсіргені анық. «Ер Едіге» — Ноғайлы дәуірінің жыры» музыкалық жинағы бүгінгі және болашақ ұрпақты жаңа ізденіске бастап, алдағы уақытта да өз жалғасын табарына сенім білдіремін. Осы орайда аталмыш шараны іске асырып, қолдау көрсеткені үшін Ақтөбе облысының әкімі Оңдасын Сейілұлына Мәдениет және спорт министрлігі атынан ерекше алғыс айтқым келеді», деді Мәдениет және спорт вице-министрі Нұрғиса Дәуешев.

Музыкалық дастан екі бөліктен тұрады, бірінші кітапта «Қырымның қырық батыры» және Едіге батыр туралы тарихи жырды жеткізген жыраулардың өмірбаяны қазақ, орыс және ағылшын тілдерінде берілсе, екінші кітапта жыр жазылған 10 диск орналасқан.

«Музыкалық альбомның басы-қасында Қазақстанның жетекші ғалымдары, тарихшылар, белгілі өлкетанушылар, этнограф, музыка зерттеушілері қатысып, өз үлестерін қосты. Жалпы идея авторы – облыс әкімі Оңдасын Оразалин, жобаның жетекшісі – атақты жырау, Қазақ ұлттық өнер университетінің профессоры Алмасбек Алматов, жобаның ғылыми жетекшісі – С.Бәйішев университетінің профессоры, едігетанушы Жұманазар Асан, өлкетанушы Бекарыстан Мырзабай, музыкалық редакторы – Қазақконцерт солисі Күнсұлу Түрікпен, дыбыс режиссері – Дастан Палманов, музыкалық шығармаларды өңдеген – композитор Амангелді Сәндібай, альбомды басып шығарған – «Қазақ кітаптары» ЖШС директоры Орынбек Әнесов және ұлттық нақышта безендіруші – суретші Айбек Орынбасаров», деп түсіндірді Мейрамбек Шермағанбет.

Музыкалық альбом 500 данамен жарыққа шықты және кітапханаларға таратылады.

Күннің маңызды және өзекті жаңалықтарын «Егемен Қазақстан» телеграм каналынан оқыңыз