Аймақтар • 22 Қаңтар, 2021

Түркістанда 1361 дау медиаторлардың қатысуымен оң шешілген

240 рет
көрсетілді
2 мин
оқу үшін

Түркістан облысында 300-ге жуық медиатор бар.  Олардың 90 пайызы кәсіби емес, бірақ беделі, өмірлік тәжірибесі мол абыройлы азаматтар. Қоғамдық медиаторлар ауыл-аймақтағы ас-жиындарда, басқосуларда отбасылық құндылықтар, қоршаған ортаға құрмет туралы тәлімді әңгімелер айтады.

Түркістанда 1361 дау медиаторлардың қатысуымен оң шешілген

Дау туындаған жағдайда ағайын-туыс, көрші-қолаң, дос-жаран арасына түсіп, басу айтып келеді. Осылайша олар мәселені үлкен дау-жанжалға жеткізбей, тараптарды татуластырып, ортақ мәмілеге келуіне сүбелі үлес қосуда.

Өткен жылы ұйымдастырылған іс-шаралардың нәтижесінде облыс бойынша 1361 дау медиация рәсімі арқылы сотқа дейінгі және сот барысындағы тәртіппен, медиаторлардың қатысуымен оң шешілген. Қазақстан халқы ассамблеясының Түркістан облысы бойынша медиация кеңесінің кезекті отырысында медиация кеңесінің төрағасы Ғани Рысбеков өңірде болған қылмыстар мен отбасылық жанжалдарды шешудегі медиаторлардың ықпалы туралы баяндады.

«Өткен жылғы карантин барысында мұғалім мен оқушы, ұстаз бен ата-ана арасындағы шиеленіс күрделі жәйтке айналды. Биыл мәселелерді шешуге модераторлық жасақтың жоспардан ауытқымай атқарылуы арнайы мамандарға тапсырылады», деді Ғ. Рысбеков.

Ал өңірдегі медиация институтын дамыту бағытында атқарылған жұмыстар туралы баяндаған Түркістан облыстық сотының судьясы Бауыржан Тәңірбердиев орын алған қылмыс, заңбұзушылық факторларына тоқталып өтті.

«Тұрғындар арасында туған дау-дамайды шешуде жұрт ауыл ақсақалдарына немесе заңнан хабары бар тұлғаларға жүгінеді. Бұқараның құқық қорғау органдарына жүгінуден қашқақтайтындығы да бар. Осы орайда халықтың саяси сауаттылығын арттыру керек»,  деді Б. Тәңірбердиев.

Сондай-ақ «Жастар ресурстық орталығы» басшысы Амалбек Өміртай жастар арасында жиі  кездесетін проблемаларды атап, оларды шешу жолдарын жеткізді.

 

 

Түркістан облысы

Соңғы жаңалықтар

Су үнемдейтін қондырғы

Технология • Кеше