Канадада Қазақстандағы парламенттік сайлау қорытындылары талқыланды

Әлем • 22 Қаңтар, 2021

Канадада Қазақстандағы парламенттік сайлау қорытындылары талқыланды

30 рет көрсетілді

Қазақстанның Канададағы Елшілігі Парламенті Мәжілісіне сайлаудың қорытындылары мен Президент Қасым-Жомарт Тоқаевтың заң шығарушы органның жаңа құрамдағы бірінші сессиясында ұсынған реформалардың үшінші пакетіне арналған онлайн семинар өткізді.

Ақмарал АҒЗАМҚЫЗЫ

Семинарға Канада Сыртқы істер министрлігінің қызметкерлері, «Қазақстан – Канада» іскерлік кеңесінің тең төрағасы, «Cameco Corporation» президенті Тим Гитцель, «CERBA» қауымдастығының президенті Жиль Бретон, ғылыми және қоғамдық топтардың өкілдері, канадалық БАҚ, ҚР Президенті жанындағы Мемлекеттік басқару академиясының Дипломатия институтының директоры Мариан Абишева, сондай-ақ Канадада тұрақты немесе уақытша негізде тұрып жатқан отандастарымыз қатысты.

Семинар барысында Елшілік Кеңесшісі Мұрат Рүстемов қатысушыларды Мемлекет басшысының құқықтық әділ мемлекетті, сондай-ақ дамыған азаматтық қоғамды қалыптастыруға бағытталған реформалардың үшінші пакетінің ерекшеліктерімен егжей-тегжейлі таныстырды. Дипломат реформалардың әлеуметтік сипатын атап өтті, олардың басты мақсаты – азаматтардың әл-ауқаты мен денсаулығы, адам құқықтары мен бостандықтарын нығайту, теңгерімді өңірлік даму – деді ол.

Өз кезегінде М. Абишева қатысушылардың назарын өткен сайлаудың ерекшеліктеріне және олардың елдің одан әрі демократиялық дамуы үшін маңыздылығына аударды. Бұл Президент Қ.Тоқаевтың кезеңіндегі алғашқы парламенттік сайлау болды және бірқатар карантиндік шектеулерге қарамастан ол табысты өтті. Елде алғаш рет парламенттік оппозиция институты ресми түрде құрылды, ал депутаттар арасында әйелдер мен жастар үлесі өсті.

Т. Гитцель Мәжіліс сайлауына дайындық пен оны өткізу барысын жоғары бағалады. Ол ірі шетелдік инвестор бола отырып, дауыс беру процесінің объективтілігі мен ашықтығын, сондай-ақ елімізде жүргізіліп жатқан реформалардың дәйектілігін ерекше атап өтті. Оның пікірінше, мұның бәрі шетелдік капитал үшін қолайлы атмосфера жасайды.

Семинар барысында спикерлер канадалық БАҚ-тың Қазақстандағы сайлау процесі туралы бірқатар сұрақтарына жауап берді. Мәселен, канадалық журналист Дэн Донован Қазақстан халқы ассамблеясының Парламенттегі өкілдігі институтына, оның заңнамалық негізіне қызығушылық танытты.

Сонымен қатар, ағымдағы жылы 10 қаңтарда Канаданың Торонто қаласында Мәжіліс сайлауына қатысқан Бақыт Адамбеков атты отандасымыз да өз пікірін білдірді. Ол Елшілік жанындағы сайлау учаскесінде дауыс берудің жеке тәжірибесі және осы үдерістің ұйымдастырушылық ерекшеліктері туралы айтып берді.

Жалпы, семинар канадалық аудиторияның, қоғамдық, ғылыми және іскерлік топтардың Қазақстандағы реформаларға айтарлықтай қызығушылығын және елімізде саяси жаңғырту үдерісі аясында өткен парламенттік сайлаудың маңыздылығын көрсетті.

Күннің маңызды және өзекті жаңалықтарын «Егемен Қазақстан» телеграм каналынан оқыңыз