Мақтааралда құрылыс жұмыстарының көлемі 255,4%-ға артты

Аймақтар • 23 Қаңтар, 2021

Мақтааралда құрылыс жұмыстарының көлемі 255,4%-ға артты

15 рет көрсетілді

Мақтаарал ауданында 2020 жылы құрылыс жұмыстарының жалпы көлемі 15,4 миллиард теңгені құрап, одан алдыңғы жылдың тиісті кезеңімен салыстырғанда 255,4%-ға артқан. Оның ішінде тұрғын үйлерді іске қосу 85 968 шаршы метрге артып, 410,7%-ға өскен, деп хабарлайды Egemen.kz.

Marzhan Tileubekova

Ауданда 8 мектептің құрылыс-монтаж жұмыстары жүргізілді. Атап айтқанда, облыстық бюджет есебінен жалпы конкурстық құны 2,9 миллиард теңгеге 5 мектептің құрылыс жұмыстары басталып, 1,1 миллиард теңгенің қаржысы игерілді. Сондай-ақ жергілікті бюджет есебінен жалпы конкурстық құны 906,0 миллион теңгеге 2 мектептің құрылыс жұмыстары жүргізіліп, 49,5 миллион теңгенің қаржысы игерілді. Нысандардың барлығы да 2021 жылға өтпелі.

2020-2025 жылдарға арналған "Нұрлы жер" бағдарламасы аясында Мақтаарал ауданы аумағында көпбалалы аз қамытылған 50 отбасыға 50 тұрғын үй сатып алуға 2020 жылы республикалық бюджет есебінен 417, 9 миллион теңге қаржы қаралып, толық игерілген. Қазіргі таңда, Мақтаарал ауданының тұрғын үй-комуналдық шаруашылық, жолаушылар көлігі және автомобиль жолдары бөлімінің коммуналдық меншігіне тапсыру рәсімдері жүргізілуде. Алдағы уақытта аталған үйлер көпбалалы аналарға табысталатын болады.

Аудан орталығы Мырзакент кентінде орталық кітапхана күрделі жөндеуден өтуде. Мырзашөл өңірінің тұрғындарының мәдениетін және интелектуалын дамытуға үлкен серпіліс беретін алып нысанның құрылысына 309 миллион теңге қаржы қарастырылды. 2021 жылдың наурыз айында пайдалануға берілетін орталық кітапханада 50 мыңнан аса кітап қоры сақталады және арнайы заманауи оқу залы мен оқу бөлмелері жұмыс жасайды. Оқушылар үшін балалар кітапханасы да жеке қарастырылған. Мәдени нысанда түрлі ақын-жазушылардың, қаламгерлердің шығармашылық кешін өткізу мақсатында 200 орындық концерт залы да жұмыс жасайтын болады.

Мырзакентте құрылысы жүрген алып нысандардың бірі - Қ.Мұңайтпасов атындағы орталық стадионы. 2066 көрерменге арналған алып нысанның жалпы конкурстық құны 240 миллион теңге. Нысанда көрерменге арналған орындықтардан бөлек, 2 қабатты әкімшілік ғимараты, спортшыларға арналған киім ауыстыратын және жуынатын бөлмелер, 12 адамға арналған сыртқы әжетхана, күзет бөлмелері бар. Сонымен қатар алып стадионның аумағында скейдворкауд, кіші футбол алаңшалары және волейбол, баскетбол алаңшаларының құрылысы да қоса атқарылды.

Мырзакенттің көркіне көрік қосатын тағы бір құрылысы жүріп жатқан нысан - Даңқ аллеясы. С.Қожанов көшесі бойындағы мәңгілік алау ескерткішін қайта құру үшін 2020 жылы бюджеттен 137 миллион теңге қаржы қаралып, құрылыс жұмыстары жүргізілуде.

Айта кетейік, өткен жылы Мақтааралда орын алған Төтенше жағдай салдарын жою бойынша 8 әлеуметтік нысанның құрылысы жүргізілуде. Оның ішінде Мырзакент кентінің жанынан бой көтерген жаңа мөлтек ауданда 400-ге жуық тұрғын үй салынып, 1 мектеп, 1 балабақша, 1 дәрігерлік амбулатория мен полиция пунктінің құрылысы жүріп жатыр. Сонымен қатар Өргебас, Фирдауси ауылдарындағы мектептер ағымдағы жөндеуден өтіп, дәрігерлік амбулатория мен полициялық тірек пункттері салынуда.

Күннің маңызды және өзекті жаңалықтарын «Егемен Қазақстан» телеграм каналынан оқыңыз