Оқиға • 25 Қаңтар, 2021

«Мен қазір 80 жастамын. Өскенде не істейтінімді әлі білмеймін» (Әйгілі тележүргізуші Ларри Кинг дүниеден өтті)

471 рет
көрсетілді
8 мин
оқу үшін

Әйгілі тележүргізуші Ларри Кинг 87 жасқа қараған шағында қайтыс болды. Қайғылы хабар туралы ең алғаш Ora Media хабарлады. CNN агенттігінің хабарлауынша, оншақты күн бұрын журналист коронавирус жұқтырғаны анықталып, Лос-Анджелестегі Cedars Sinai медициналық орталығына түскен.

«Мен қазір 80 жастамын.  Өскенде не істейтінімді әлі білмеймін» (Әйгілі тележүргізуші Ларри Кинг дүниеден өтті)

 

Ларри Кинг өз мансабының 60 жылдан астам уақытын радио мен телевизия саласына арнап, әлем­нің көптеген мемлекеті­нің басшыларынан, танымал тұлға­лар­дан сұхбат алды. Ол жүргізген CNN арнасындағы Larry King Live бағ­дарламасын шартараптың түкпір-түкпіріндегі миллиондаған көрермен тамашалады. 1985 жылдан 2010 жылға дейін жалғасқан телешоу жер-жаһандағы ең үздік жобаның бірі саналды.

Кингтің өмірі – журналистиканы серік еткендердің бәріне үлгі. Ол 1933 жылы Нью-Йоркте діндар еврейлердің отбасында дүниеге келген. Шын аты – Лоренс Харвей Зейгер.

Ларри 8 жасқа толғанда әкесі Эдуард жүрек талмасынан дүние салған. Сөйтіп, қаршадай Кинг анасына көмектесіп, отбасын асырауға мәжбүр болған. Ол бала кезінен радиода жұмыс істеуді армандайды. Әйткенмен, мектепті аяқтаған соң еңбекке ерте араласуына тура келген. Сөйтіп, 20 жастағы Ларри пошта қызметімен айналысатын UPS компаниясына жұмысқа тұрады. Бірақ арманынан күдер үзбейді.

Оның тағдырын өзгертуге бір оқиға қатты әсер етеді. Бірде ол CBS арнасының журнали­сі­мен жолығып қалады. Тәжі­ри­белі маманмен құмары тарқа­ғанша әңгімелеседі. Сөйтіп, жур­на­листің ақылын тыңдап, Фло­рида штатына тартып кетеді. Сәті түсіп, Майамидегі радио­стан­­­салардың біріне диджей қызметіне ілігеді.

Сөйтіп жүргенде радиодағы тілшілердің бірі кенеттен жұмыс­тан кетеді. Кингтің талабын аң­ғарған басшылық оған бағ­дарлама жүргізуге рұқсат етеді. Ларри диджейлікпен қатар жаңа­лықтар мен спорт ақпаратын тыңдарманға жеткізіп отырған. Сол кезде оның жалақысы аптасына небәрі 50 доллар ғана болған екен.

Ларри Кингтің өміріндегі тағы бір ерекше оқиға мынау. Алғашқыда ол радиоға шын аты-жөнімен Лоренс Харвей Зейгер болып шығып жүреді. Бірде басшылары дәл тікелей эфир алдында Зейгер есімі жұрттың есінде қалмайтынын айтып, тез арада тегін ұлтынан хабар бермейтін атауға ауыстыруды сұрайды. Ларри (Лоренсті еркелетіп осылай атаған) ұзақ ойланбастан, есіне түскен алғашқы тіркесті – King’s Wholesale Liquor жарнамасындағы Кинг сөзін таңдайды. Жаңа есім жұртшылықтың назарын бірден аударады. Сөйтіп, ол екі жылдан кейін аты-жөнін толықтай Ларри Кинг деп өзгертеді.

Кейінірек еңбекқорлығы мен тапқырлығының арқасында оның жүргізген радио шоулары тыңдарманның ықыласына бөленеді. Осылайша, аймаққа танымал журналиске айналады. 1970-ші жылдары атағы тіптен аспандап, бүкіл АҚШ-қа танылды. 1978 жылы Ларри Mutual Broadcasting System (MBS) радио­­сына ауысады. Осында ол Larry King Show токшоуын жүргізеді.

Аталған бағдарлама Кингтің даңқын шартарапқа жайды. MBS-те бірнеше жыл жұмыс істегеннен кейін CNN арнасы оны аттай қалап шақыртады. Сөйтіп, Ларри Larry King Live токшоуының негізін қалады. Бұл бағдарламаны 2010 жылға дейін тұрақты жүргізді.

Осы уақыт ішінде ол көптеген танымал тұлғалардан интервью алған. CNN арнасының мәліметіне сүйенсек, журналистік мансабында Кинг 50 мыңнан астам адамнан сұхбат алған екен. Олардың қатарында Мартин Лютер Кинг, Далай Лама, Билл Гейтс, Маргарет Тэтчер, Михаил Горбачев секілді әлемге әйгілі тұлғалар бар. Сондай-ақ АҚШ-тың 38-ші президенті Джеральд Форд та қонақтарының бірі болған. Ларри Кинг содан бері Барак Обамаға дейінгі АҚШ-тың президенттерінің бәрінен интервью алып шыққан.

Оның 1993 жылғы токшоуын бір сәтте 16,3 миллион адам көріп, рекорд орнатты. Кингтің 1995 жылы Палестина басшысы Ясир Арафатпен, Израиль премьер-министрі Ицхак Рабинмен және Иордания патшасы Хусейнмен жүр­гізген интервьюлері де шар­тараптың қызығушылығын оятты.

Ларридің журналистика сала­сындағы марапаттары мың­дап саналады. Солардың ішінде Peabody сыйлығы мен Эмми сый­лығының шоқтығы биік. Сондай-ақ Cable ACE марапатын 10 мәрте иеленген.

Ларри Кинг – журналистикада өз қолтаңбасын қалдырған тұлға. Ол ешқашан интервью алып отырған қонағының ұстанымы­на қарсы келетін сұрақ қоймаған екен. Сондықтан шығар, кейбіреу­лер оны тым жеңіл сауалдың иесі деп айыптаған. Алайда оның осындай тәсілі көрермендер мен тыңдармандарға қатты ұнай­­тын. Сол себепті, жұртқа өз ойын айту­ға құмар танымал тұлғалар Ларри Кингтің интервьюіне қуана-қуана келісетін.

Кингтің тағы бір ерекшелігі – еш­қашан сұхбат алатын ада­мы­ның кітаптарын оқы­май­тындығы. Тіпті, интервьюге алдын ала дайындалмайды екен. Өйткені ол сұхбаттасы тура­лы көрермендер мен тыңдар­ман­дардан артық білуді ұнатпа­ған. Оның қойған сауалдары кейіп­керінің болмысын ашуға бағытталған.

Тіпті кейде ешкім күтпеген мәселеге тоқталады. Мәселен, Кинг бір сұхбатында АҚШ пре­зи­денті лауазымын атқарған Рич­ард Никсоннан «Уоторгейттің тұсы­нан өтіп бара жатқанда өзіңізді бір­түрлі сезінбейсіз бе?» деп сұрапт­ы. Естеріңізде болса, Ақ үйді бас­қарып тұрған Р.Никсон «Уотер­гейт шуы» деп аталған оқиға­дан кейін қызметінен кеткен еді. Енді бірде Рональд Рейганға «Еш­теңені еске түсіре алмасаңыз, ыза­ла­н­асыз ба?» деген сауал қойыпты.

Ларри Кингтің журналистика­дағы ұстанымдары да өзгеше. Ол былай дейді: «Күн сайын таңер­тең бүгін айтатындарым маған ештеңе үйретпейтінін есіме салып отырамын. Егер бір нәрсені біл­гім келсе, тыңдап үйренуім ке­рек. Сөйлеп жатқанымда ешқа­шан ештеңе үйренген емеспін».

«Мен бәрін білетін секілді көрінгім келмейді», дейді ол. Сондықтан ол сұхбат берген президенттерден өте күрделі саяси мәселелерді сұрамайтын. «Оның орнына «Президент мырза, бұл қызметте сізге не ұнайды?» немесе «Өміріңіздегі ең үлкен қателігіңіз қандай?» деп айтамын», деп ағынан жарылады Ларри.

Біреуден сұхбат алудың орнына, өзі интервью бергенде Кинг ағынан жарылады. «Бірде тілші менен өзімді қаншалықты журналист санайтынымды сұра­ды. «Білмеймін», деп жауап бер­дім. Өйткені мен тілші болып Иракқа барғым келмейді, бірақ онда барғандармен әңгімелескен ұнайды», дейді ол.

«Неге деген сұрақты қойған жөн. «Неге мұны істедіңіз?» Неге деген сұраққа бір ғана сөзбен жауап берілмейді».

«Табысқа жеткен адам бақ туралы айтпаса, өз-өзін алдап жүр».

«Спорт – маған қатты ұнайды. Ең әуелі соның жаңалықтарын қараймын».

«Кедей кезімді ешқашан ұмыт­паймын. Жолым болып кеткені туралы да ойлауды тоқтат­қан емеспін».

«Бастапқыда бәрін істей бере­тінмін. Майамиде жаңалық жүргіздім, ауа райын хабарладым, спорт туралы айттым, диджей болдым».

«Бір нәрсе істесең, оның нәти­жесін күт».

«Мен United Parcel Service жүк көлігіне мініп, үйлерді аралап сүт саттым. Бірақ әрдайым радиода жұмыс істеуді армандайтынмын».

Мұның бәрі – Ларри Кингтің әр жылдары айтқан сөздері. Осыдан бірнеше жыл бұрын ол былай деген екен: «Мен қазір 80 жастамын. Өскенде не істейтінімді әлі білмеймін».

 

Соңғы жаңалықтар

Су үнемдейтін қондырғы

Технология • Кеше