Кино • 26 Қаңтар, 2021

Жаңа драма: «Туған күніңізбен, анашым!»

831 рет
көрсетілді
1 мин
оқу үшін

Алматыда StartDrama театр лабораториясы Фархад Молдағалидің режиссерлігімен OzgeEpic өнер кеңістігінде «Туған күніңізбен, анашым!» атты қойылым қойды. Спектакль жас жазушы Әлішер Рахаттың аттас пьесасы желісінде сахналанып отыр.

Жаңа драма: «Туған күніңізбен, анашым!»

Биылдан бастап StartDrama театр лабораториясымен жеті жас жазушының жеті пьесасын жеті жас режиссер сахналайды. «Туған күніңмен, Анашым!» – солардың алғашқысы.

Су жаңа пьеса бүгінгі қоғамдағы от­ба­сылық проблемаларды қаузай­ды. Қа­рапайым әрі трагедиялы тақы­рып­­тың­ сахнаға келуі турасында спектакль режиссері: «Қазақ театрларында көбіне классика қойылады. Жас, жаңа драматургтарға көңіл бөлінбей жатыр. OzgeEpic сияқты кішкентай жерде үлкен өнерді насихаттап, олқылықтың орнын толтырғымыз келеді. Сондықтан жалпы өнерге жанашыр кез келген адамға ашықпыз», дейді.

Қойылымда бір-бірінің тіршілігінен мүлдем бейхабар ағайынды үшеу анасының туған күніне жиналады. Қара шаңырақта бәрі бәз баяғы қалпында. Сонда да туған бауыр­лар біртүрлі жатырқайтын сияқты. Бәлки, күйбең тірлік оларды бір-бірінен баяғыда-ақ алыстатып жіберген болар.

Басты рөлдегі Ердәулетті актер Нұржан Асылхан, ортаншы ұл Бақдәулетті Ерке­бұлан Мусин, ал үйдің кенжесі Сырымды Нұрбол Құмарша ойнайды. Үшеуі де Сәбит Мұқанов атындағы Сол­түстік Қазақстан облыстық қазақ сазды-драма театрында өнер көрсеткен.

Автор шығармашылығындағы сәтті шыққан алғашқы пьеса «Тәуелсіздік толғауы» байқауында отбасы құндылықтарын насихаттайтын үздік үш пьесаның бірі атанған. Театрларда заманауи тақырыптарды қоз­ғайтын шығармалар аз екенін ескерсек, атал­ған туынды көрермен қауымды жаңа бір кеңістікке алып келді. Жаңа драманы елорда сахнасында күтеміз.