Балғын таланттарды баулитын бағдарлама

Іс-шараға суретшілер мен өнер­танушылар, БКМ мен астанадағы өнер, музыка мектептерінің жетекшілігі, оқытушылары мен оқушылары, Білім беруді жаңғырту орталығы мен «Рухани жаңғыру» жобалық кеңсесінің өкілдері қатысты. Көрмеге әртүрлі техникада орындалған мектеп түлектерінің 50-ден астам жұмысы қойылды. «Туған өлкем» республикалық бағдарламасының аясында Елбасы кітапханасы мен Нұр-Сұлтан қаласының Балалар көр­кем­сурет мектебі – ЮНЕСКО клу­­бының өткізетін көрмелері биыл үшін­­ші рет ұйымдастырылып отыр. Бұл ретте жобаның ашылу салтанаты Тәуелсіздіктің 30 жылдығымен тұспа-тұс келіп тұр. Көрмеге қатысқан 15-16 жастағы суретшілер тәуелсіздік дәуірінде дүниеге келген. Олардың балалық шағы, өмірі мен шығармашылығы егемендігімізден сусындайтыны хақ. Бүгінде қалың жұрттың назарына ұсы­нулы тұрған жастардың жұмыстары – тәуелсіздіктің жемісі», деді Қазақстан Республикасының Тұңғыш Президенті – Елбасы кітапханасының директоры Бақытжан Темірболат.

Н.Ә.Назарбаевтың «Рухани жаң­ғыру» бағдарламалық мақаласы аясында орындалған «Туған өлкем» рес­публикалық бағдарламасы жас та­ланттарды анықтауға және респуб­ликаның қосымша білім беру ұйым­дарының жұмысын насихаттауға бағытталған. Бағдарлама 2018 жылдан бастап жүзеге асырылып келеді. Осы уақыт ішінде Елбасы кітапханасының алаңында Семей, Шымкент, Павлодар, Екібастұз, Қарағанды, Шахтинск және Көкшетау қалалары мектептері түлек­терінің дипломдық жұмыстарының көр­мелері ұсынылған еді.

– Біз, суретшілер қауымы үшін халық үмітін толық ақтай алатын дарынды, парасатты буынның бой кө­теріп келе жатқанын көру – үлкен қуа­­ныш. Көрменің ерекшелігі ұсы­нылған жұмыстардың қашықтан орын­далғанына негізделеді. Бұл үрдістің оқыту­шыларға да, оқушыларға да оңайға соқпағаны анық. Дегенмен де туын­дылар деңгейінің биіктігін жоғалтпай, келушілердің көзайымына айналып отыр. Кескіндеме, графика, сәндік-қол­данбалы өнер – бәрі де көздің жауын алады. Қиын-қыстау кезеңде бұл сұлулықты тамашалау мүмкіндігін берген ұйымдастырушыларға алғысымыз зор, – дейді Суретшілер одағы басқар­ма­сының мүшесі, суретші Динара Нөгер.

Айта кетейік, елордадағы Балалар көркемсурет мектебі – ЮНЕСКО клубы 1983 жылы құрылған. Содан бергі жылдар аралығында мектеп өзіндік дәстүрлерді қалыптастырып, көркемдік білім беру саласында педагогикалық жұмыс тә­жірибесін жинақтады. Ал аталған көрме 25 ақпанға дейін жалғасады.