Елорда • 29 Қаңтар, 2021

Балаларды өрттен құтқарған ұландық «Жас сарбаз» қозғалысымен марапатталды

59 рет көрсетілді

Жаңа жыл қарсаңында елордада үш бірдей бүлдіршіннің өмірін тілсіз жаудан арашалаған Ұлттық ұлан жауынгегрі ефрейтор Темірлан Әмірғазин ерлігі үшін кезекті марапатын алды, деп хабарлайды Egemen.kz

Айым ДӘУІТ

Осы жолы оны алғыс хат әрі бағалы сыйлықпен «Жас сарбаз» балалар мен жасөспірімдер әскери-патриоттық қозғалысы атап өтті. Марапатты ұландық батырға аталған ұйымның Нұр-Сұлтан қаласы бойынша филиалының төрағасы Асхат Налшыбек табыс етті.

"Біздің мақсатымыз – Темірлан бауырымыздың жасаған ерлігін жастар арасында насихаттау. Бүгінгі жастардың осындай ерлікке, батылдыққа барғанына, жігерлі болғанына біз мақтанамыз. Себебі ата-бабамыз балаға бес жасынан қолына қару беріп, атқа отырғызған. Ал қазіргі білім заманында жастардың әскери-патриоттық бағытта тәрбие алуы – ол өте маңызды. Бауыржан Момышұлы атамыз айтқандай: «Ешкімде іштей батыр болып тумайды. Батырлық та мінез секілді өскен орта, көрген тәрбиеге байланысты қалыптасады». Ұлттық ұлан қатарында тәрбиеленіп жатқан жастардан осындай Темірлан секілді батыр ұлдар әлі талай шығатынына сенімдіміз", деді Асхат Налшыбек.

Естеріңізге сала кетсек, Ұлттық ұлан әскери қызметшісі ефрейтор Темірлан Әмірғазин Жаңа жыл қарсаңында елордадағы азық-түлік дүкендерінің бірінде тұрғанда төбеден сылақ түсіп, желдету шахтасынан қою түтін шығып жатқанын байқайды.

Қауіпті сәтті қалт жібермеген жауынгер дүкенге келушілер мен сатушылардың тез арада далаға шығуын өтінеді.

Осы уақытта ол түтіннің екінші қабаттан шығып жатқанын көреді. Сөйтсе бұл дүкен сатушысының пәтері екен. Ұландық жауынгер дереу өрт сөндіруші қызметке қоңырау шалып, үй иесімен бірге баспанадан 3 бүлдіршінді қауіпсіз жерге алып шығады.