Жамбыл облысындағы Қазақ-қырғыз мемлекеттік шекара шебінде ҚР ҰҚК Шекара қызметі «Оңтүстік» өңірлік басқармасы Қордай шекара отрядында «Сортөбе» шекара бекетінің салтанатты ашылу рәсімі өтті.
Жамбыл облысындағы Қазақ-қырғыз мемлекеттік шекара шебінде ҚР ҰҚК Шекара қызметі «Оңтүстік» өңірлік басқармасы Қордай шекара отрядында «Сортөбе» шекара бекетінің салтанатты ашылу рәсімі өтті.
Қазақстан Республикасының Мемлекеттік шекарасын жайластыру жөніндегі мемлекеттік бағдарлама аясында еліміздің оңтүстік және шығыс өңірлерінде биылғы жылы 20 бөлімше іске қосылды.
Қазақстан Республикасы Ұлттық Қауіпсіздік комитетінің төрағасы Нұртай Әбіқаев «Сортөбе» бекетін аша отырып, бөлімше бастығына рәміздік кілтті тапсырды. Сонымен бірге, ол мемлекеттік шекараны жайластыру ауқымды мемлекеттік бағдарламасын жүзеге асыруда кезекті қадам жасалғандығын, тек 2013 жылы жаңа талаптарға сай 20 шекара бекетінің іске қосылғандығын атап өтті.
– Еліміздің іргесін бекемдеу мақсатында салынған бұл «Сортөбе» шекара бекеті заман талабына сай соңғы үлгідегі техникалармен жабдықталған. Радиолокациялық, бейнебақылау аппараттары, бір өзі бірнеше функцияны атқаратын қондырғылар, ауа райы мен табиғи жағдайдың барлық өзгерісіне ыңғайландырылған мобильді техника және қозғалыс құралдарының қажетті түрлерімен қамтамасыз етіліп отыр. Мемлекетіміздің тәуелсіздігі мен тұтастығын сақтау үшін ел шекарасын бекемдеу керек. Ұлттық қауіпсіздік мәселесіне Елбасы Нұрсұлтан Назарбаев ерекше мән беріп, барынша көңіл бөлуде, – деді Нұртай Әбіқайұлы.
Комитет басшысының қолынан бекет шекарашылары жаңа пәтерлердің кілттерін алды. Парламент Сенатының депутаттары, Жамбыл облысының әкімі және басқа да шақырылған қонақтар шекара қалашығының инфрақұрылымымен, сондай-ақ, автокөлік және шекаралық қызметке қолданылатын арнайы техникалармен танысты.
Оларға кезекші бөлімінен бастап офицерлер тұратын үйлерге дейін көрсетіліп, шекара сақшылары биылғы жылы алынған автомобильдер мен арнаулы техникалардың қалай жұмыс істейтіндігін іс жүзінде көрсетті.
«Сортөбе» шекара бекетінде тиісті аймақты алыстан бақылау корпусы мен спорт залы, тікұшақ қонатын алаң, қызметкерлердің демалатын орны және шекаралық қызметтің аттары мен иттерін бағатын шағын қора-жайы да бар.
Толықтай жабдықталған мұндай бекеттер елдің экономикалық ахуалын да танытады. Сонымен қатар, былтыр ғана қабылдаған Шекара туралы Заң да мемлекеттің тұтастығы мен ел тыныштығын сақтау міндетіне қызмет етеді. Айта кету керек, соңғы 2-3 жылдың көлемінде Жамбыл облысында 12 шекара бекеті пайдалануға беріліп отыр. Бір ғана Қордай ауданының өзінде 5 бекет салынуда. Шекара қызметі үшін бой көтерген бекеттер мемлекет территориясының тұтастығын сақтаумен қатар, сол өңірдегі кішігірім ауылдар мен елді мекендердің жағдайына да жағымды әсер етуде. Жаңа мектеп, балабақша мен емхана салынып, тақтайдай тас жол түсуде. «Сортөбе» шекара бекетін «Промхиммонтаж» АҚ 11 айда соғып, белгіленген мерзімде тапсырып отыр.
Депутаттар Қазақстан шекарашыларының халық пен елдің мүддесіне риясыз қызмет ететіндігіне, әскери антқа және қызметтік парызға адал болатындығына сенім білдірді.
Қанат ЕСКЕНДІР,
«Егемен Қазақстан».
АЛМАТЫ.
