Өткен сенбіде Премьер-Министр Серік Ахметов Мемлекет басшысының үстіміздегі жылдың 20 желтоқсанындағы Индустрияландыру күнін өткізу барысында берген тапсырмаларын жүзеге асыру мәселесі бойынша кеңес өткізді. Кеңеске орталық атқару органдары мен ұлттық компаниялардың басшылары, салалық ассоциациялардың жетекшілері қатысты.
Өткен сенбіде Премьер-Министр Серік Ахметов Мемлекет басшысының үстіміздегі жылдың 20 желтоқсанындағы Индустрияландыру күнін өткізу барысында берген тапсырмаларын жүзеге асыру мәселесі бойынша кеңес өткізді. Кеңеске орталық атқару органдары мен ұлттық компаниялардың басшылары, салалық ассоциациялардың жетекшілері қатысты.
Индустрияландыру, шағын және орта бизнесті дамыту мәселелері бойынша Премьер-Министрдің орынбасары – Индустрия және жаңа технологиялар министрі Әсет Исекешев, Өңірлік даму вице-министрі Серік Жұманғарин, «Атамекен одағы» Қазақстанның ұлттық экономикалық палатасының» басқарма төрағасы Абылай Мырзахметов баяндамалар жасады.
Президент тапсырмаларын жүзеге асыру мәселелеріне қатысты Серік Ахметов министрліктер мен ведомстволар қызметінің басым бағыттарын атап көрсетті.
«2014 жылдың бірінші жарты жылдығының соңына дейін біз индустрияландырудың екінші бесжылдық бағдарламасын әзірлеп, оған мұнай-газ өнеркәсібі, тау-кен, металлургия, агроөнеркәсіп секілді экономиканың базалық салаларын кешенді дамыту жоспарын ұштастыруымыз қажет», деген Премьер-Министр осыған байланысты еліміздің өнеркәсіптік дамуы жөніндегі комиссия құруды жеделдетуді тапсырды.
«Оның үстіне индустрияландырудың екінші бесжылдық бағдарламасын әзірлеу кезінде біздің өнеркәсіптік саясатымыздың икемді болуын, ол әлемдік ағымдардың өзгерістеріне жедел бейімделуге қабілетті болып шығуын ескеруіміз керек», деді Серік Ахметов.
Мұнымен қоса, Үкімет басшысы барлық мүдделі мемлекеттік органдарға шағын және орта бизнестің дамуына кедергі келтіріп отырған нормаларды анықтап, олардың күшін жою бағытында қолданыстағы заңдылықтарға тексеру жүргізуді тапсырды. Жекеменшік институтын одан әрі нығайту, өз ісін жаңа бастаған кәсіпкерлерге қызметтерінің перспективалық бағыттарын айқындау үшін қолдау көрсету мәселелеріне қатысты стратегиялық әдіс-тәсілдерді айқындайтындай ұсыныстарды әзірлеу қажеттігін де баса көрсетті.
«Бизнесті қолдаудың әдіс-тәсілдері мен тетіктері жөніндегі ақпараттарды әрбір кәсіпкерге дейін жеткізуіміз қажет. Осы бағытта ісін жаңа бастаған кәсіпкерлерге арналған жолбасшылық кеңес беру анықтамалықтары халық арасында кеңінен насихатталатын болсын. Кәсіпкерлерге қызмет көрсететін орталықтардың жұмысын осы мәселелерде барынша тиімді етуіміз және пайдалануымыз керек», деді Премьер-Министр.
Сонымен қатар, Үкімет басшысы кәсіпкерлік субъектілерін негізсіз және жоспардан тыс тексерулерді тоқтату туралы барлық министрліктер мен ведомстволарға тапсырмалар берді.
Кеңесті қорытындылай келе, Президенттің барлық тапсырмалары нақты және тура белгіленген мерзімінде орындалуы қажеттігін қатаң ескертті.
Сұңғат ӘЛІПБАЙ,
«Егемен Қазақстан».
