Экономика • 11 Ақпан, 2021

Күн сәулесінен күш алған

227 рет
көрсетілді
2 мин
оқу үшін

Қарағанды облысында баламалы энергия көздерін дамыту қарқынды бағыт алды. Мысалы, қазіргі таңда өңірдегі «жасыл» энергетиканың қуаттылығы 300 мегаватқа жетті. Бүгінде облыста төрт бірдей күн электр стансасы қалыпты жұмыс істеп тұр. Бұдан бөлек тағы да жаңа нысандар салу жоспарда бар.

Күн сәулесінен күш алған

Облыстық энергетика және тұрғын үй-коммуналдық шаруа­шылық басқармасының басшысы Ұлантай Үсенов жаңғыр­малы энергия көздерін дамыту – келешектегі маңызды міндет­тердің бірі екенін айтты.

– Қазір Қарағанды облысын­дағы Саран қаласында, Ақтоғай ауданының Гүлшат ауылында, Шет ауданындағы Ақадыр кентінде, Жезқазғанның жанындағы Кеңгір елді мекенінде жалпы қуаты 200 МВт болатын төрт күн электр стансасы жұмыс істеп тұр. Сонымен қатар Абай және Бұқар жырау аудан­дарында екі биогаз стансасы және Ынтымақ су қоймасында ша­ғын су электр стансасы қуат көзін өндіреді. Облыс бойынша жа­ңар­тылған және баламалы энергия­ның жалпы қуаты 227,97 МВт құрайды, – деген мәлімет берді ол.

Қазіргі таңда шетелдік және отандық инвесторлар «жасыл» энергетиканы дамытуға мүдделі. Мысалы, жоғарыда айтылған төрт күн стансасы жобасына инвесторлар 102 млрд теңге қаржы салған. Соған қарағанда бұл жобалар инвестор үшін экономикалық жағынан қайтарымы аса тиімді шаруа болса керек.

Алдағы уақытта облыста жаңғыр­малы энергия көздерінің қуа­тын арттыру бойынша ауқым­ды жоспар қарастырылған. Мысалы, Балқаш қаласының маңындағы Қоңырат елді мекеніне жақын жерде қуаты 100 МВт болатын күн электр стансасының құрылысы биыл аяқталып, іске қосылады деген болжам бар.

Сондай-ақ Саран қаласында тағы бір баламалы энергия көзін өндіретін нысан салынбақшы. Бұл – қуаты 100 МВт және одан жоғары жинақтауыштары бар гибридті күн электр стансасының жобасын чех инвесторы жүзеге асыруды жоспарлаған. Айта кететін бір жайт, жергілікті атқарушы биліктің шетелдік инвесторларға құшағы ашық. Мысалы, Сарандағы жоба үшін күн электр стансасын салуға 18 га жер телімі бөлінген.