Міне, жақында қазақ руханияты тағы бір құнды дүниемен толықты. Көрнекті мемлекет және қоғам қайраткері, танымал ғалым Өмірзақ Озғанбаевтың бес томдық шығармалар жинағы жарыққа шықты. Әлі сиясы кеуіп үлгірмеген жаңа туынды «Ресей Мемлекеттік думасы», «Тарих тағылымы», «Қазақтың шешендігі мен көсемдігі астасқанда», «Жарық жұлдыздар», «Тағзым» атты бес томнан құралып, қазақтың тарихи тұлғаларының, атақты көсемдері мен шешендерінің ел көсегесін көгерту жолындағы жанкешті қайраткерлік істері толағай толғаныстармен баяндалған.
Автор шығармаларында Алаш мұрасы мен мұратын танудың терең толғамы көрініс тапқан. Ұлтымыздың сан ғасырлық рухы мен мұратының ұлы бұлқынысына айналған Алаш қозғалысы қайраткерлерінің тағдыры да – өзекті мәселе. Алаш қайраткерлері күресінің тағылымы да, Алаш қаламгерлерінің мұрасы да жылдан-жылға қазақтың рухани-мәдени өміріне еніп жатқандығы көңіл қуантады. Алаш зиялыларының саяси және рухани күресіндегі негізгі мақсат, орасан міндет, ол ұлтымызды ұйыстыру, сол арқылы елдігімізді айқындау болып табылады. Қазақтың оқыған, ұлтжанды азаматтарының тізе қосып, елдің болашағы үшін атқарған ерен істері де айқын көрініс тапқан. Ресейде қос үкіметтің орнауының салдары қазақ халқының өз алдына шаңырағы бөлек ел болуын көксеген Алаш серкелерінің саяси сахнаға шығып үлкен мінбер Мемлекеттік Думадан үн қатқаны тарихтан мәлім. Бұл кітаптарда Ә.Бөкейхан, Б.Құлманов, М.Тынышбаев, Ш.Қосшығұлұлы, т.б мемлекеттік жүйе құруға күрескен қайраткер тұлғалар туралы деректерді көптеп кездестіресің.
Ғалым Өмірзақ Озғанбайұлы ағамыздың еселі де еңселі еңбегі жиырмасыншы ғасыр басындағы қоғамдық ой-сананы оятып, ұлтын азаттық пен тәуелсіздік жолына жетелеген халқымыздың аяулы перзенттерінің аруақтарына бас иіп, мәңгі өшпес бейнелеріне қойған ескерткіші деп айтуға болады. Тарихи-танымдық мұрамыздың қайнарын қалқып алып, шығарманың өзегіне айналдырып еш қоспасыз, боямасыз, бұлтартпас деректерді, айнымас айғақтардың қиысын келтіре қолдана отырып оқырманға жайып салған.
Бейбіт ОСПАН,
Қазақстан Журналистер одағының мүшесі
