Адамға шапқан арлан

– Сағат тоғыздан асқан уақыт, кешкі тамағымызды ішіп, теледидар көріп отыр­ғанбыз, – дейді біз арнайы барып жолыққан Әсем Қажым­бекқызы. – Кенет ауладан шабаланып үрген иттің даусы естілді. Басында мән берген жоқпыз, бірақ иттің үруі үдей бас­таған соң сыртқа шық­тық. Мен аяғыма пима сұғып, иығыма бір жемпірді жамыла салған болатынмын. Көрші үй­дің иесі көшкенде оның қора-сайманын тегіс сатып ал­ғанбыз, малдың көбі сол жақ­та жатқан. Күйеуім солай қарай кетті, арғы жақтан көршілер шығып, абыр-дабыр күшейе бастаған-ды.

Ұлым екеуіміз есік алдына оралдық. Кенет ол: «Мама, қарашы, қасқыр ғой деймін, бір­деңе жүр», – деп қолымен қа­шаның сыртын нұсқады. «Қой, қайдағы қасқыр?», деп беттей бергенім сол еді, қа­шаға кіріп келген сұр арлан «арс» етіп маған қарай атылды. Сасқанымнан сол жақ қо­лымды төсей бердім, қауып кеп алғанда көзімнің оты жарқ ете қалды, одан әрі қарай не бол­ғанын еміс-еміс білемін. Бө­рі иықтан бір қауып өтіп, қолым­ды тістелеп, сілкілей жө­нел­генде шырылдап ұм­тылған ұлыма: «Жолама, ау­лақ кет бұл жерден!» деп ай­қайлағаным есімде. Маған жаны ашыған ұлым тыңдамай жаныма жетіп келген еді, қас­қыр оны да саннан ала тү­сіп, лақтырып жіберді. «Апыр-ай, оқыс қылды-ау», деп бар күшімді жиып, қайта ұм­тыл­дым, сол кезде көрші аулада жүрген Мұқан да жетіп үл­гер­ді. Абырой болғанда ол қо­лына айыр ұстай кірген екен. Ештеңеден тайынбастан өзіне атылған қасқырдың кеудесіне шаншып үлгерген айырды ота­ғасы одан әрі нығыздап қа­дап, жібермей тұрғанда көр­шілер де келіп жетіп, жабыла соғып, жыртқышты жер қаптырды.

Иығына тіс батып, біле­гінің бұлшық еті парша-пар­ша болып, саусағы сынған Әсем мен санының қалың етінен жарақат алған Жігердің өміріне төн­ген қауіп сейілді, деген­мен, олар басы кесіліп, меди­ци­на­лық сараптамаға әкелінген қас­қыр құтырғаннан аман болса екен деп алаңдаулы.

Әдейілеп аулайтын аң­шы­ның жоқтығынан өңі­ріміз­де жыртқыш атаулының емін-еркін жортып жүргені шын­дық. Бұдан жарты ай бұрын тағы бір көкжал осы ауылдың тұрғыны Т.Мұхаметуәлиевтің қорасына түсіп, алдынан жо­лыққан таймас төбетпен алысып жатқанда дереу келіп жет­кен үй иесі оны сүйменмен соғып өлтірген болатын. Осы бетпен кете берсе, түбінде адам шығынына жолығуымыз әбден мүмкін. Ендеше, қатердің алдын алып, тиісті шаралар қол­данбасақ, орны толмас өкі­­нішке ұрынарымыз хақ. «Сақ­тан­саң – сақтаймын» деген на­қылды ұмытпайық, ағайын!

Хасен ЗӘКӘРИЯ

Шығыс Қазақстан облысы,

Күршім ауданы