Медицина тарихында бет трансплантациясы бойынша бірнеше ота жасалған. Дегенмен, бүгінге дейін жақсы нәтиже бергені тіркелмепті. Кейінгі ота Францияда жасалған. Алайда науқас көп ұзамай қайтыс болған.
Джо Димео Нью-Йорктегі фармацевтикалық компанияда лаборант болып қызмет етеді. 2018 жылы түнгі ауысымнан шығып, үйіне беттегенде қалғып кетіп, апатқа ұшыраған. Салдарынан Джоның денесі күйіп, ерін, қабағы мен қолынан айырылды. Бұған дейін де ол 20 пластикалық ота жасатыпты. 2019 жылы оны Нью-Йорк университетінің медицина орталығына жіберген. Арада бір жыл өткенде жақсы жаңалық жетті.
«Мұндай сыйлық өмірде бір-ақ рет болады. Донордың отбасына алғыс айтамын. Менің ата-анам маған екінші мүмкіндік бергені үшін дән риза», деп ағынан жарылды.
«Ота тек науқастың кескінін жақсартып қоймай, дене мүшелерінің дұрыс жұмыс істеуін қамтамасыз етуі керек болатын. Әсіресе қолының жұмысы қатты алаңдатты», деді бет трансплантациясы бағдарламасының директоры Эдуардо Родригес.
Отадан кейін Джо 45 күн бойы қарқынды терапия бөлімінде бақылауда болды. Тағы екі айын ауруханада өткізді. Онда науқасқа бәрін қайта бастауға тура келген. Көзін ашудан бастап, қолымен зат ұстауды да жаңадан үйренуге мәжбүр болыпты. Қазір Джо жаттығу залына бара алады, тіпті ас дайындауға да кіріскен.
Ем-дом әлі де жалғасып жатыр. Джо күніне 5 сағат физиотерапия алады. Сәтті нәтижені хабарлау үшін дәрігерлер бірнеше ай уақыт күткен. «Біз оның ағзасы жаңа мүшелерін қабылдағанын күттік. Қазір ота жақсы өтті деп айта аламыз», дейді дәрігерлер.
Дайындаған
Светлана ҒАЛЫМЖАНҚЫЗЫ,
«Egemen Qazaqstan»
