Аудандық мәслихаттағы ең жас депутат, 22-ге енді толған азамат ел алдында берген уәдені орындау басты мақсаты екенін айтады. «Қайырымдылық – халқымыздың ең ізгі қасиеттерінің бірі, ізгіліктің көрінісі. «Қайырымдылық жасасаң, қайырын өзің көресің» дейді дана халқымыз. Сонымен қатар қайырымдылықты жақсылық жасаумен балап, оны имандылықтың, сүйіспеншіліктің, тәрбиеліктің, парасаттылықтың айқын көрінісі деп білемін. Елдің қолдауымен Nur Otan партиясының праймеризі әрі жастар квотасы арқылы мандатқа ие болдым. Мақсатым – ел сенімін ақтау. Партия бағдарламасындағы міндеттерді орындауға бар күш-жігерімді саламын», дейді Мұхтар Аманкелдіұлы.
Азық-түлік пен тұрмысқа қажетті заттар салынған қораптарды Келес аудандық Жастар ресурстық орталығының өкілдері мен Jas Otan жастар қанатының еріктілері тұрғындарға таратып берді. Көмек алған тұрғындар депутат пен жергілікті имамдарға, ерікті жастарға ризашылықтарын білдірді. Бұл игі істі Қазақстан мұсылмандары діни басқармасының «Тайқазан» жобасы аясында «Келес-Абай» қайырымдылық қоры ұйымдастырғанын да айта кетелік.
Сондай-ақ жуырда Созақ аудандық мәслихатының депутаты, жеке кәсіпкер Бағлан Сүгірбаев Шолаққорған ауылының аз қамтылған, асыраушысы жоқ, мүмкіндігі шектеулі жандары бар отбасыларына көмек көрсетті. Жомарт жан 50 отбасыға 1 тоннадан көмір түсіріп берді. Дәлірек айтсақ, 35 шаңыраққа көмір түсіріп берсе, 15 отбасының әрқайсысына отын алатын қаражат ұсынды. Үйлерге қатты отынды үлестіріп, таратып беруге аудандық Жастар ресурстық орталығының жанынан құрылған Valu» еріктілер ұйымы көмектесті. Қысы қаталдау келетін теріскейлік тұрғындар депутат пен ерікті жастарға ризашылықтарын білдірді.
Айта кетелік, қазіргі күнге дейін Түркістан облысында барлық деңгейдегі мәслихаттардың жаңа депутаттары 70 кездесу өткізіп, 214 тұрғынның өтініштері мен талап-тілектерін қабылдап үлгерді.
Түркістан облысы
