Іс-шараға Президенттің көмекшісі – Қауіпсіздік Кеңесінің хатшысы Әсет Исекешев, орталық мемлекеттік органдардың басшылары, менторлар және өнеркәсіп, АӨК, құрылыс, геология, денсаулық сақтау, білім беру, медиа, сауда және логистика, су ресурстары, туризм, мәдениет және спорт командаларының өкілдері қатысты.
Өзгерістерді басқару жөніндегі салалық менеджерлерді даярлау бағдарламасы Нұрсұлтан Назарбаев қорының бастамасымен, Үкіметтің жобалық офисімен бірлесіп жүзеге асырылды. Бағдарламаның мақсаты – экономиканың негізгі салаларын трансформациялау үшін нақты ұсыныстар әзірлеу.
2020 жылдың басында өткізілген конкурс қорытындысы бойынша 2 958 үміткерден, әсіресе, жетекші ұлттық және шетелдік ұйымдарда үлкен практикалық жұмыс тәжірибесі бар 234 сарапшы іріктеліп алынды. Бағдарламаға менторлар ретінде Қазақстанның, АҚШ-тың және Еуропа елдерінің мемлекеттік және жеке секторларынан 64 маман қатысты.
2020 жылы Премьер-Министр А.Мамин бағдарламаға қатысушылармен 50-ге жуық жүзбе-жүз кездесу өткізді. Өзгерістерді басқару жөніндегі менеджерлер салалық міндеттерді шеше отырып, еліміздің дамуына үлес қосып қана қоймай, Елбасы академиясы ұйымдастырған тренингтік іс-шаралар барысында өз біліктіліктерін жақсартты.
Үкімет басшысы Өзгерістерді басқару жөніндегі салалық менеджерлерді даярлау бағдарламасы Тұңғыш Президент – Елбасы Нұрсұлтан Назарбаев пен Мемлекет басшысы Қасым-Жомарт Тоқаев тарапынан жастардың жобалары мен бастамаларын қолдаудың, сондай-ақ Үкіметтің жас мамандармен тиімді өзара іс-қимылының жарқын мысалы болып отырғанын атап өтті.
Салалық менеджерлердің, менторлардың және мемлекеттік органдар өкілдерінің үйлесімді жұмысының нәтижесінде елді дамытуға бағытталған 150-ден астам нақты бастама әзірленген.
«Салалық менеджерлердің әрбір ұсынысын тиісті мемлекеттік органдар егжей-тегжейлі қарады. Әр сала бойынша жол карталары әзірленді. Енді біздің басты міндетіміз – олардың іс жүзінде жүзеге асырылуын қамтамасыз ету. Міндеттердің басым бөлігі осы жылдың соңына дейін орындалуы тиіс», деді А.Мамин.
Премьер-Министр салалық менеджерлердің бастамаларын іске асыру Қазақстан Республикасының 2025 жылға дейінгі ұлттық даму жоспары шеңберінде экономиканың тұрақты өсімін қамтамасыз ету және халықтың әл-ауқатын арттыру бойынша міндеттерді шешуге ықпал ететінін атап өтті.
