Айта кету керек, дәл осындай іс-шара екі жыл бұрын Нұр-Сұлтан қаласында өткізіліп, оған екі елдің 100-ден астам бизнес өкілі қатысқан болатын.
Қазақстанның 13 өңірінен 60-тан астам компания мен мемлекеттік органдардың өкілдері енген делегацияны Сыртқы істер министрінің орынбасары Алмас Айдаров бастап барды. Мысыр тарапынан форумға бизнес-қоғамдастықтың 200-ден астам өкілі, сондай-ақ Мысыр Сыртқы істер министрінің орынбасары Тарик әл-Уасими, Оңтүстік Синай провинциясының губернаторы, генерал Халед Фуда, Мысыр сауда палаталары Федерациясының басшысы Ибрахим әл-Араби қатысты.
Форумда сөз алған Қазақстанның Мысыр Араб Республикасындағы Төтенше және өкілетті елшісі Қайрат Лама Шариф:
«Біздің еліміз Египетті Африканың «қақпасы» ретінде қарастыра отырып, Қазақстан-Мысыр Іскерлік кеңесі мен сауда-экономикалық ынтымақтастық жөніндегі Үкіметаралық комиссияның көмегімен экспортты ілгерілетуге дайын. ЕАЭО-ға мүше елдер мен Мысыр арасындағы еркін сауда туралы келісімге қол қою қазақстандық өнім экспортын ұлғайтуға қосымша серпін береді, бұл халқы 100 млн адамнан асатын Мысыр нарығына жол ашады», деп атап өтті.
Спикерлердің айтуынша, өнімнің қымбаттауы және екі ел арасындағы сауда қарқынының баяулауы мемлекеттердің арасы алыстығына байланысты. Соған қарамастан, Қазақстанның тауар айналымын 4 есеге жуық ұлғайтуға мүмкіндігі бар. «Бұл тұрғыда қазақстандық компаниялар 300 млн долларға жуық сомаға сапалы тауарлар ұсына алады», деді Сауда және интеграция вице-министрі Қайрат Төребаев.
Осы бағыттағы жұмысты жандандыру алдағы уақытта болатын Мысыр Сыртқы істер министрінің Қазақстанға алғашқы ресми сапарымен, сондай-ақ екі ел арасында кезекті саяси және консульдық консультациялар өткізумен байланысты.
Іс-шара барысында «Қазақстанда жасалған» әмбебап көрме ұйымдастырылып, онда қазақстандық өндірушілердің Африка құрлығына экспорттайтын өнімдері ұсынылды. Сонымен қатар отандық және мысырлық компаниялар арасында екіжақты келіссөздер жүргізіліп, бірқатар экономикалық құжатқа қол қойылды.
«Егемен-ақпарат»
