Жиында партияның «Өзгерістер жолы: Әр азаматқа лайықты өмір!» сайлауалды бағдарламасын орындау жөніндегі жол картасы талқыланды. Облыс әкімі, партия филиалының төрағасы Өмірзақ Шөкеев жол картасында аймақтағы ең өзекті мәселелер мен жоспарлар қамтылғанын атап өтті. Құжатқа 26 көрсеткіш пен 128 іс-шара енгізілген. «Бүгін сайлауалды бағдарламаны жүзеге асырудың «Жол картасы»ұсынылып отыр. Бұл – Мемлекет басшысының тікелей бақылауында тұрған тапсырма. Сондықтан сайлауалды бағдарламаны сапалы әрі уақтылы атқару қажет. Жол картасын жүзеге асыру барысында 5 жылда облыста 40 мыңға жуық жаңа жұмыс орны ашылады. 152 жаңа кәсіпорын ашу және кеңейту арқылы шағын және орта бизнес субъектілерінің саны 350 мыңға жақындайды. Ауыл шаруашылығын қолдау күшейіп, 53 ферма, 900 мал бордақылау алаңы құрылады. Бес жылда 21 мыңнан астам пәтер ел игілігіне беріледі. «Жол картасы» облыстағы ең өзекті мәселелерді шешеді. Партияластарға, жергілікті жауапты басшыларға осы тапсырмаларды жүйелі орындауды тапсырамын», деді Өмірзақ Шөкеев.
Ал облыстық стратегия және экономикалық даму басқармасы басшысының міндетін атқарушы Күмісбек Жаппаров «Жол картасындағы» негізгі индикаторлар мен жоспарларды баяндады. Елдің ұсыныс-тілектері ескерілген құжатта Nur Otan партиясының 2021-2025 жылдарға арналған сайлауалды бағдарламасына сәйкес, ауыл шаруашылығы, туризм, инвестиция тарту, аймақтарды өркендету, денсаулық сақтау, білім, инфрақұрылым, құрылыс салаларын дамыту, жаңа жұмыс орындарын ашу бағыттарына басымдық берілген. Сонымен бірге Түркістан қаласын түркі әлемінің рухани-мәдени орталығына айналдыру міндеті де көрініс тапқан. Партияның облыстық филалы төрағасының бірінші орынбасары, фракция жетекшісі Бейсен Тәжібаевтың баяндауынша, фракциядағы 37 депутатқа жол картасының салалары бойынша нақты міндеттер жүктелген. «Осы жоспар негізінде облыстың әрбір аудан, қаласын, елді мекендерін жан-жақты дамыту көзделіп отыр. «Жол картасының» әрбір тармағына жауапты депутаттар бекітілген», деді Бейсен Дәулетұлы.
Мәжіліске қатысқан фракция мүшелері партияның сайлауалды бағдарламасын жүзеге асыруға арналған жол картасын бірауыздан қолдап, облыстық Саяси кеңес бюросына бекітуге ұсынды.
Түркістан облысы
